თემურ ჭყონია: რესტორატორებმა ძველი ნივთები და მენიუ აღადგინეს, კულტურა შექმნეს
„კოკა-კოლა ბოთლერს ჯორჯიას“ პრეზიდენტი, თემურ ჭყონია მთავრობას ურჩევს, მეტი ყურადღება დაუთმოს სარესტორნო ბიზნესს. ბიზნესმენის თქმით, ქართველმა რესტორატორებმა მენიუს სახით კულტურა შექმნეს, რომელსაც გაფრთხილება სჭირდება.
„ერთ მშვენიერ დღეს რომ თქვან, ჩვენ რესტორნებს აღარ გავხსნით საერთოდო, რას ვშვრებით მერე ჩვენ? რა ტურიზმზე იქნება საუბარი? სახელმწიფომ ბიუროკრატიის თემის შემცირებით რაღაც უნდა გადაარჩინოს. ვიღაც უნდა შეწიროს, რაღაც უნდა მოხდეს. ვიღაცისთვის არსებული ბალანსი უნდა დაარღვიოს. რადიკალური თემები უნდა დასცხონ, თორე არ გამოვა არაფერი. თუ რადიკალურად არ დაინგრა ეს ყველაფერი და დიდი თანხები არ გამოათავისუფლეს, თუ ისევ მეგობრულ თემებს აყვნენ ჯიგრულად, არაფერი გამოვა.
ვინ შექმნა სარესტორნო ბიზნესი? ის შექმნა პროფესიონალი ადამიანების ერთობამ. მათ შექმნეს კულტურა და მენიუ. რესტორანი ის ხომ არ არის - დაასხი, დალიე. მათ კულტურა შექმნეს, ძველი ნივთები აღადგინეს, ძველი დიზაინი. შექმნეს კულტურა, რომლის სანახავადაც ადამიანები სხვა ქვეყნებიდან ჩამოდიან. რუსეთში ორი ცნობილი მენიუა. ეს არის იტალიური და ქართული. როდესაც სტუმრები ჩადიან ორი არჩევანია, სად წავიდეთ, იტალიურში, თუ ქართულშიო. ასეთი მომენტი მსოფლიოს ბევრ ქვეყანაში დადგება. ჩვენი რესტორატორების აზრი, მენიუ, შემოქმედება ნელ-ნელა ძალიან ბევრ ქვეყანაში გავა და შესაძლოა დადგეს, მაგალითად, სამი არჩევანი - ადგილობრივი, იტალიური და ქართული“,- ამბობს თემურ ჭყონია.
