"თელასის" 24,5%-იანი წილის მფლობელი დღეს აუქციონზე გამოვლინდება

„საპარტნიორო ფონდი“ სს „თელასის“ კაპიტალში კუთვნილი აქციების წილის - 24.5%- ის გასასხვისებლად საჯარო აუქციონს მართავს.

საჯარო აუქციონის საწყისი ფასი 10,511 მლნ დოლარია. ბიჯის ოდენობა 50,000 ლარი. აუქციონის დროს დაფიქსირებული ფასი დაკონვერტირდება აშშ დოლარებში  ეროვნული ბანკის დადგენილი გაცვლითი კურსის შესაბამისად.

გასათვალისწინებელია, რომ აუქციონში გამარჯვებული ვერ შეიძენს აქციებს, თუ „ენერგეტიკისა და წყალმომარაგების შესახებ“ საქართველოს კანონით დადგენილი წესით ვერ მიიღებს საქართველოს ენერგეტიკისა და წყალმომარაგების მარეგულირებელი ეროვნული კომისიის თანხმობას.

აღსანიშნავია, რომ "თელასი" ზარალზეა. 

6 თვის მონაცემებით, „თელასმა“ რეალიზაციიდან 190.59 მლნ ლარის შემოსავალი მიიღო, მაშინ როცა 2019 წლის ამავე პერიოდში შემოსავალი 226 მლნ-ს აღემატებოდა.

პანდემიის ფონზე მკვეთრად შემცირდა როგორც მოსახლეობის მიერ მოხმარებული, ასევე კომერციული და სამრეწველო სექტორის მოხმარებული ელექტროენერგიის მოცულობა.