თბილისის და ბათუმის აეროპორტებს "აეროპორტების ჯანმრთელობის აკრედიტაციის" სერთიფიკატი მიანიჭეს
თბილისისა და ბათუმის აეროპორტებმა კიდევ ერთი საერთაშორისო აღიარება მოიპოვეს. თბილისის საერთაშორისო აეროპორტს უკვე მესამედ, ხოლო ბათუმის საერთაშორისო აეროპორტს - მეორედ, ACI-ის „აეროპორტების ჯანმრთელობის აკრედიტაციის“ სერთიფიკატი მიენიჭა.
„ტავ ჯორჯიას“ ინფორმაციით, აეროპორტების ჯანმრთელობის აკრედიტაციის სერთიფიკატი, რომელსაც აეროპორტების საერთაშორისო საბჭო (ACI) გასცემს, აეროპორტში დანერგილი ჯანმრთელობის ზომებისა და პროცედურების საერთაშორისო სტანდარტებთან შესაბამისობის აღიარებაა.
„აეროპორტების საერთაშორისო საბჭოს (ACI) აეროპორტების ჯანმრთელობის აკრედიტაციის პროგრამა ადასტურებს, რომ თბილისისა და ბათუმის საერთაშორისო აეროპორტებში ACI-სა და ICAO-ს რეკომენდაციების შესაბამისად, მგზავრებისთვის უზრუნველყოფილია უსაფრთხო გარემო“, - აცხადებენ თბილისისა და ბათუმის აეროპორტების ოპერატორ კომპანია „ტავ ჯორჯიაში“.
