"თბილღვინო" უკვე ახალ ზელანდიაშიც იყიდება

კომპანია „თბილღვინოს“ მიერ წარმოებული ღვინო უკვე ახალ ზელანდიაშიც იყიდება. კოპანიამ მიმდინარე წელს 10 ახალი პარტნიორი მოიძია. „თბილღვინოს“ 2022 წლის მიღწევებსა და სიახლეებზე „ბიზნესპარტნიორი“ კომპანიის დამფუძნებელს ზურაბ მარგველაშვილს ესაუბრა.

„გავაძლიერთ არსებულ პარტნიორებთან თანამშრომლობა. 2-2 ახალი კონტრაქტორი დავიმატეთ ისეთ ქვეყნებში, სადაც ისედაც ვიყავით წარმოდგენილები, კერძოდ - უკრაინაში, დიდ ბრიტანეთში, პოლონეთში. ამასთან, შევედით ისეთ ბაზრებზე, სადაც ქართული ღვინის ცნობადობა დაბალია, კერძოდ - ახალ ზელანდიაში, არაბთა გაერთიანებულ საამიროებში, უნგრეთში. შემიძლია ვთქვა, რომ 2022 წელი, რომელიც იყო გამოწვევების წელი, ვაქციეთ შესაძლებლობების და გაძლიერების წლად“,- აღნიშნა ზურაბ მარგველაშვილმა.

მისივე ინფორმაციით, კომპანიამ რუსეთ-უკრაინის ომიდან გამომდინარე, 2022 წელს რეპუტაციული რისკის დაზღვევისთვის შეაჩერა და დღემდე შეჩერებული აქვს რუსეთში გადატვირთები. გარდა ამისა, მიმდინარე წლის მიღწევებში, „თბილღვინოს“ დამფუძნებელი ლონდონში, 3 სხვადასხვა საერთაშორისო კონკურსში მიღებულ 49 მედალსაც ასახელებს, რომელიც ქართული ღვინის კიდევ ერთი გამარჯვებაა.

აღსანიშნავია, რომ 2022 წელს „თბლილღვინომ“ ვენახების გაშენებაც განაგრძო და მისი ვენახების ფართობი უკვე 400 ჰექტარს გადასცდა.