"თბილღვინო" წარმოებაში ენერგოეფექტურ წარმოების ხაზს ნერგავს
„თბილღვინო“ წარმოებაში ინოვაციურ ტექნოლოგიებს ნერგავს - საუბარია, ენერგოეფექტურ წარმოების ხაზზე.
როგორც „ბიზნესპარტნიორს“ კომპანიის დამფუძნებელმა ზურაბ მარგველაშვილმა განუცხადა, ამჟამად, მათ საწარმოში ახალი ხაზის გამართვის და ინსტალაციის პროცესი მიმდინარეობს. პროცესი მაისის ბოლოს, ან ივნისის შუა რიცხვებში დასრულდება.
„ენერგოეფექტური დანადგარი ღვინის ჩამოსასხმელი ხაზია, რომელსაც აქვს იმაზე მეტი წარმადობა, ვიდრე ჩვენს არსებულ ხაზს. ის ტექნოლოგიურად უფრო განვითარებულია და მისი გამოყენებით, 1 ერთეული პროდუქციის წარმოებისთვის ჩვენ დავხარჯავთ უფრო ნაკლებ რესურსებს“, - განმარტა ზურაბ მარგველაშვილმა.
მისივე ინფორმაციით, გარდა ამისა, კომპანია მუშაობს ქვევრის ღვინის წარმოებისთვის ცალკე მარნის მოწყობაზე.„ეს მარანი არქიტექტურულად იქნება უნიკალური და ყველა მასალა, რომელიც მისი აშენებისთვის გამოიყენება გარემოს დაცვის ძალიან მაღალი სტანდარტების მიხედვით იქნება შექმნილი“, - აღნიშნა ზურაბ მარგველაშვილმა.
როგორც „თბილღვინოს“ დამფუძნებელი ამბობს, კომპანია ვენახების განვითარებაზეც მუშაობს და ეს სამივე პროექტი, EBRD-თან და თიბისისთან თანამშრომლობით ხორციელდება.
