თავთუხი: ქვეყანაში მცხობელის პროფესია არ არსებობს
"ჩვენს სექტორში, კადრების თვალსაზრისით კატარსტროფული მდგომარეობაა, ქვეყანაში მცხობელის პროფესია არ არსებობს," -ამის შესახებ „ბიზნესპარტნიორთან“ პურ-ფუნთუშეულის მწარმოებელი კომპანია „თავთუხის“ დამფუძნებელმა, მზია ბენდელიანმა განაცხადა.
მისი თქმით, ამ ეტაპზე მცხობელის პროფესია საფუძვლიანად არსად ისწავლება. ამ თემაზე არაერთ ორგანიზაციასთან აქტიურობამ კი ჯერჯერობით შედეგი ვერ გამოიღო.
„ქუთაისში კულინარიული პროფესიული სასწავლებელია, რომელთანაც თანამშრომლობა გვინდა, რათა მომზადებული კადრები გამოგვიგზავნონ, რომლებსაც დავასაქმებთ," -აცხადებს ბენდელიანი.
როგორც „თავთუხის“ დამფუძნებელი აღნიშნავს, ამ ეტაპზე ცვლაში 3 კადრი ჰყავს დასაქმებული, თუმცა, ძირითადი საქმის საკუთარ თავზე აღება თავად უწევს, ვინაიდან სექტორში კადრების დეფიციტია.
ცნობისთვის, საოჯახო ბიზნესი „თავთუხი“ პურ-ფუნთუშეულის მწარმოებელი კომპანიაა, რომელიც ბაზარზე 7 წელია ოპერირებს და ამ ეტაპზე, მხოლოდ ქუთაისშია წარმოდგენილი.
