"შოკოტელა" სექტემბერში თბილისში ახალ მაღაზიებს გახსნის

ხელნაკეთი შოკოლადების მწარმოებელი კომპანია „შოკოტელა“ წლის ბოლომდე ბრენდული მაღაზიების ქსელის განვითარებას გეგმავს.

როგორც „ბიზნესპარტნიორს“ კომპანიის დამფუძნებელმა მარიამ კაპანაძემ განუცხადა, ჯერჯერობით, წარმოების გაზრდაზე მიდის მუშაობა და უკვე ამის შემდგომ, ახალი ფილიალებიც გაიხსნება.

„თუ რამე არ შეიცვალა, წესით, სექტემბერში თბილისში რამდენიმე ახალ ბრენდულ მაღაზიას გავხსნით. საწყის ეტაპზე, მოლებს ავითვისებთ. გვინდოდა, მაღაზიის გახსნა ბათუმშიც, მაგრამ წელს ეს ამბავი არ გამოვიდა, ამიტომ, სამომავლო გეგმებში დავტოვეთ ბათუმის ფილიალის გახსნა“,- განმარტა მარიამ კაპანაძემ.

მისივე თქმით, კომპანიის წლევანდელ გეგმებში გუნდის და საწარმოს გაფართოება, ასევე ახალი პროდუქტების შექმნა შედის.

აღსანიშნავია, რომ პროდუქციის საკუთარ ბრენდულ მაღაზიაში რეალიზაციის გარდა, „შოკოტელა“ ადგილობრივ ბაზარზე არსებულ კომპანიებთანაც თანამშრომლობს და მათთვის სასაჩუქრე ნაკრებებს ქმნის.

„მაგალითად, საახალწლოდ, ვითანამშრომლეთ სხვადასხვა სასტუროებთან. მათ შორის, Pullman-თან, რომელმაც სასაჩუქრე ნაკრებები შეგვიკვეთა. გარდა ამისა, ვითანამშრომლეთ ძალიან ბევრ ქართულ, თუ არაქართულ კომპანიასთან. წელს, 30-ამდე კომპანია იყო ჩვენი დამკვეთი“, - აღნიშნა მარიამ კაპანაძემ.

ცნობისთვის, „შოკოტელა“ ხელაკეთი შოკოლადის წარმოებისთვის ნედლეულად უმაღლესი ხარისხის ბელგიურ შოკოლადს იყენებს. კომპანია საფირმო მაღაზიასა და საწარმოს ვაკეში, ბარნოვის ქუჩაზე ფლობს.