სექტემბრიდან ბაზარზე MONTEA-ს მწვანე ჩაი ველური პიტნით გაიყიდება

ამბროლაურში მდებარე ჩაის გადამამუშავებელი საწარმო MONTEA ასორტიმენტს აფართოებს. სექტემბრიდან, რეალიზაციაში ამავე ბრენდის ქვეშ წარმოებული ველური პიტნის ჩაი ჩაეშვება.

„უკვე მზად არის ჩაის ახალი სახეობა - ველური პიტნა, რომელიც მწვანე ჩაის ბაზაზე დამზადდა. მზად გვაქვს შეფუთვებიც და სექტემბრის მეორე ნახევრიდან, როდესაც ჩაის რეალიზაციისთვის აქტიური სეზონი იწყება, ახალ პროდუქტს გაყიდვაში ჩავუშვებთ“, - განუცხადა „ბიზნესპარტნიორს“კომპანიის მარკეტინგის დეპარტამენტის ხელმძღვანელმა ანი ხეცურიანმა.

მისივე ინფორმაციით, ველური პიტნა, რომლითაც ჩაის ახალი სახეობა შექმნეს, ჯავახეთის მთებშია შეგროვებული.

„გარდა ასორტიმენტის გამრავალფეროვნებისა, აქტიურად ვმუშაობთ HoReCa სექტორთან თანამშრომლობაზეც. უკვე მზად გვაქვს სპეციალურად ამ სექტორისთვის შექმნილი შეფუთვებიც და მალე, სავარაუდოდ ასევე სექტემბრიდან, მომხმარებელი MONTEA-ს ბიო ჩაის დაგემოვნებას რესტორნებსა და კაფეებშიც შეძლებს“, - განმარტა ანი ხეცურიანმა.

მისივე ინფორმაციით, MONTEA-ს ბრენდის ცნობადობა ქართულ ბაზარზე მნიშვნელოვნად გაზრდილია და გაყიდვების მაჩვენებლებით, აღნიშნული ბრენდი საქართველოში ჩაის მწარმოებელი მოწინავე კომპანიების სამეულშია. ხეცურიანის თქმით, კომპანიაში ელოდებიან, რომ მიმდინარე წელსაც, 2022 წელთან შედარებით, MONTEA-ს გაყიდვები 20%-ით გაიზრდება.

„ჩვენი მთავარი მიზანია, სრულად ავითვისოთ ქართული ბაზარი. ცხადია, განვიხილავთ საექსპორტო ბაზრების მოძიებას და MONTEA-ს ბრენდით, ჩაის ექსპორტსაც. აქამდე რამდენიმე ქვეყანაში, მათ შორის - გერმანიაში, პოლონეთსა და ესპანეთში ჩვენი ჩაი ასაწონი სახით გაიგზავნა და არა ბრენდირებულად. ამიტომ, სამომავლოდ, ამ კუთხითაც ვაპირებთ გააქტიურებას“, - აღნიშნა კომპანიის მარკეტინგის დეპარტამენტის ხელმძღვანელმა.

ცნობისთვის. Montea 300 ათას დოლარიანი ინვესტიციით, ქართულ ბაზარზე 2021 წელს გამოჩნდა. ამ ეტაპზე, კომპანია 6 სახეობის ბიო ჩაის აწარმოებს.