სანდომი: საკონდიტრო სფეროში ტექნოლოგების ძალიან დიდი დეფიციტია

კვალიფიციური კადრების მოძიებას საკონდიტრო ბიზნესშიც ჭირს. როგორც „ბიზნესპარტნიორს“ საკონდიტრო „სანდომის“ მარკეტინგის მენეჯერმა თეკლა თალაკვაძემ განუცხადა, კომპანია მუდმივად პროფესიონალი ტექნოლოგების ძიებაშია.

„საქართველოში, სამწუხაროდ, ტექნოლოგების ძალიან დიდი დეფიციტია. ჩვენთან საკონდიტრო სფერო, სხვა ქვეყნებთან შედარებით, თუნდაც იგივე უკრაინა და რუსეთი რომ ავიღოთ, მაღალ დონეზე განვითარებული არ არის. თუმცა, ბოლო დროს, წამოვიდა ტენდენცია და ეს სფერო იწყებს ნელ-ნელა წინსვლას. ხშირად გვყავს მოწვეული ტექნოლოგები, რომლებთანაც ჩვენი ტექნოლოგები გადიან გადამზადებას, ან მიდიან მივლინებაში კვალიფიკაციის ასამაღლებლად“, - განმარტა თეკლა თალაკვაძემ.

მისივე თქმით, საწარმოში სხვა მიმართულებით ადამიანური რესურსის დეფიციტი არ არის, თუმცა, კადრები ჭირს დისტრიბუციის ნაწილშიც.

ცნობისთვის, საკონდიტრო „სანდომი“ ბაზარზე 2011 წელს გამოჩნდა. ის საქართველოში 2 საწარმოს ფლობს, 400-ზე მეტ ადამიანს ასაქმებს და 120-ზე მეტი სახეობის ტკბილეულს აწარმოებს.