საქართველოს თანაინვესტირების ფონდი მტკვარი ჰესის მშენებლობას 2021 წლის ბოლოს დაასრულებს
საქართველოს თანაინვესტირების ფონდი მტკვარი ჰესზე ძირითადი სამუშოების დასრულებას 2021 წლის ბოლოსთვის გეგმავს.
როგორც „ბიზნესპარტნიორს“ ფონდის აღმასრულებელმა დირექტორმა ცოტნე ებრალიძემ განუცხადა, მტკვარი ჰესი ინვესტიციების მოცულობით საქართველოს თანაინვესტირების ფონდის ყველაზე მსხვილი პროექტია, მისი საინვესტიციო ღირებულება 157 მლნ დოლარია.
2014 წელს თანაინვესტირების ფონდმა მრავალი წლის მანძილზე გაჩერებული პროექტი სრულად შეისყიდა და მშენებლობა გააახლა. პროექტის ჯამური დადგმული სიმძლავრე 53 მგვტ-ია, ელექტროენერგიის საშუალო წლიური გამომუშავება 251.5 მლნ კვტ.სთ.
სავარაუდო წლიური გამომუშავება საქართველოს მთლიანი ელექტროენერგიის მოხმარების 2% (2020 წელს 12.7TWh).
„პროექტი აქტიურ რეჟიმში მიმდინარეობს, 2020 წლის თებერვლის თვის დასაწყისში, „მტკვარი ჰესის“ ფარგლებში, საქართველოში Double Shield TBM-ით გაყვანილი ყველაზე გრძელი და დიდი დიამეტრის მქონე გვირაბის ექსკავაცია დასრულდა (გვირაბის სიგრძე 9,6 კმ-ია, ხოლო ექსკავაციის დიამეტრი 6 მეტრი). გვირაბის ექსკავაცია პროექტის ერთ-ერთი ყველაზე მნიშვნელოვანი და ხანგრძლივი ეტაპი იყო, მოცემული ფაზის დასრულებით მშენებლობა დასკვნით ეტაპზე გადავიდა,“ - აცხადებს ებრალიძე.
