საქართველომ შესაძლოა მეწყერსაწინააღმდეგო მოწყობილობის წარმოება დაიწყოს - AG Telekom-ის გეგმები
რუსთავში მდებარე ქარხანა AG Telekom-ში, შესაძლოა მეწყერსაწინააღმდეგო აპარატების წარმოება დაიწყოს. კომპანია 2016-2018 წლებში ქართულ ტელევიზორებს აწარმოებდა.
როგორც რუსთავში მდებარე ქარხანა AG Telekom-ის ხელმძღვანელი მიხეილ ღლონტი „ბიზნესპარტნიორთან“ აცხადებს, პროექტი დამტკიცების შემთხვევაში მსოფლიო ბანკის ფინანსური მხარდაჭერით განხორციელდება, AG Telekom-ი კი უბრალოდ შემსრულებელი კომპანია იქნება.
„აპარატი ქართველი ინჟინრების მიერაა შექმნილი და დამკვეთებიც ისინი არიან. ახლა ვერ გავაჟღერებ მათ ვინაობას. მათ სურთ, რომ ჩვენს ქარხანაში დამზადდეს. დღეს ბაზარზე აღნიშნული მოწყობილობის ანალოგი არსებობს, თუმცა, საიმედოობის თვალსაზრისით, ეს ბევრად მეტი იქნება,“ - აცხადებს ღლონტი.
მისი განცხადებით, საქართველოში წარმოებული მეწყერსაწინააღმდეგო აპარატი საექსპორტო იქნება.
შეგახსენებთ,AG Telekom-მმა ქართული ტელევიზორების წარმოება 2018 წელს შეაჩერა და ციფრული მაუწყებლობისთვის საჭირო რისივერების გამოშვებაზე გადავიდა, რომელიც ამ ეტაპზე 100%-ით ექსპორტზე გადის. კომპანიამ კრიპტოვალუტების გამომუშავებაც დაიწყო.
