საქართველომ ეკონომიკური სიძლიერისთვის რძის წარმოება უნდა განავითაროს - გლენბერი

გაყინული ხილ-ბოსტნეულის ექსპორტიორი კომპანია „გლენბერის“ დამფუძნებელი რაფაელ მაღალაშვილი „ბიზნესპარტნიორთან“ აცხადებს, რომ საქართველო ეკონომიკურად რომ გაძლიერდეს, ამისთვის რძის წარმოება უნდა განავითაროს.

მისი ინფორმაციით, მიზეზი, თუ რატომ ვერ ვითარდება დღეს ქვეყანაში რძის ინდუსტრია, არის ფინანსებზე ნაკლები ხელმისაწვდომობა.

„თანხა უნდა მოვიზიდოთ სესხად და არა საჩუქრად.  წლიური 2-3%-იანი სესხის დაბრუნებაზე პასუხისმგებელი უნდა იყოს ხალხი. ეს გახდება იმის საფუძველი, რომ განვითარდეს წარმოება და დასაქმდეს ხალხი,“ - აცხადებს მაღალაშვილი.

მისი განმარტებით, საქართველოში  რძის მწარმოებელი 2 დიდი ქარხანა საკმარისი იქნება. „დღეს საქართველოდან ყოველწლიურად გადის 2.5 მილიარდი ლარი მარტო რძის პროდუქტების შემოტანაზე და 2 მილიარდი ლარი - რძის ფხვნილის შემოტანაზე. საკუთარი წარმოების არსებობის შემთხვევაში კი ასეთი გასავალი ქვეყანას არ ექნება," - აცხადებს მაღალაშვილი.

საქსტატის ინფორმაციით, საქართველოში, 2020 წელს რძის წარმოება გაიზარდა. უწყების წინასწარი მონაცემებით, 2020 წლის ბოლოს რძის წარმოებამ 99 მილიონი ლიტრი შეადგინა, რაც წინა წლის ანალოგიურ მაჩვენებელზე 5.3%-ით  მეტია.