საერთაშორისო ბაზარზე კონტეინერების გადაზიდვის ღირებულება მცირდება

საერთაშორისო ბაზარზე კონტეინერების გადაზიდვის ღირებულება მცირდება.როგორც „ბიზნესპარტნიორს“ გადამზიდავი კომპანია Kairos Logistics-ის დირექტორმა მიხეილ ნამადოვმა განუცხადა, საფასო პოლიტიკა, რომელიც რუსეთ-უკრაინის გამო, ზრდისკენ შეიცვალა, დღეს უკვე სტაბილიზაციისკენ მიდის.

„ბაზარი მიეჩვია არსებულ მდგომარეობას და კომპანიები მოერგნენ არსებულ რეალობას. კონტეინერების გადაზიდვის ღირებულებამ პიკს ომის დაწყების პერიოდში მიაღწია, მიმდინარე წლის იანვრიდან კი, ფასებმა დაღმასვლა დაიწყო. დაახლოებით, ფასების 10-დან 15 პროცენტამდე კლება ფიქსირდება ამ დროისთვის“, - აღნიშნა Kairos Logistics-ის დირექტორმა.

მისივე ინფორმაციით, დაღმავალი ფასების ფონზე, მზარდია ტვირთნაკადი და ზრდა ფიქსირდება როგორც სახმელეთო, ისე საზღვაო გადაზიდვებში. „საქართველოში, დღეისათვის, ვერ ნახავთ თავისუფალ სასაწყობე მეურნეობას. დატვირთულობა საკმაოდ მაღალია“, - აღნიშნა მიხეილ ნამადოვმა.

მისივე ინფორმაციით, Kairos Logistics-ს მოზიდული ტვირთების რაოდენობა 2022 წელს, წინა წელთან შედარებით, 30-40 პროცენტით გაეზარდა.

შეგახსენებთ, კომპანია Kairos Logisitcs ახორციელებს ნებისმიერი სირთულის გადაზიდვებს, მთელი მსოფლიოს მასშტაბით.