სააღდგომოდ კვერცხის ფასი სტაბილურად, არსებულ ნიშნულზე შენარჩუნდება
მეფრინველეობის ასოციაციის ინფორმაციით, სააღდგომოდ კვერცხის ფასი სტაბილურად, არსებულ ნიშნულზე შენარჩუნდება.
როგორც ასოციაციის ხელმძღვანელმა ზურაბ უჩუმბეგაშვილმა „ბიზნესპარტნიორს“ განუცხადა, თუ ეროვნული ვალუტის გამყარების ტენდენცია გრძელვადიან პერსპექტივაში შენარჩუნდება, სექტორი ფასებს შემცირების კუთხითაც გადახედავს.
„ლარი ბოლო პერიოდში ისეა გამყარებული, რომ ამ ფონზე ფასის მატება გამორიცხულია. ბოლო 15 წლის განმავლობაში პირველად არის, რომ დადებითი ტენდენციები გამოიკვეთა, აქედან გამომდინარე ნამდვილად ვერ ვიტყვით, რომ ფასის ზრდის რაიმე საფუძველი არსებობს.
კლებას რაც შეეხება, გრძელვადიან პერიოდშია უფრო გასათვლელი. თუ დღევანდელი მდგომარეობა სტაბილურად შენარჩუნდება და ასე გაგრძელდება სიტუაცია, ქათმის ხორცისა და კვერცხის გაიაფება დაიწყება. მაგრამ ახლა აღდგომამდე ერთი კვირაა დარჩენილი და ფასის კლებაზე საუბარი ამ ეტაპზე არ არის, მერე ვნახოთ.“-აღნიშნა ზურაბ უჩუმბეგაშვილმა.
