რუსთავში "მადარტის" ახალი კონცეფციის სერვისცენტრი გაიხსნა

„მადარტი“ ახალი კონცეფციის სერვისცენტრების განვითარებას იწყებს. საქართველოს მასშტაბით, პირველი ასეთი ობიექტი რუსთავში გაიხსნა. კომპანიაში ამბობენ, რომ რუსთავის მოსახლეობის მხრიდან „მადარტის“ პროდუქციაზე მაღალი მოთხოვნა ფიქსირდებოდა, თუმცა, მიტანის სერვისის ტარიფებიდან გამომდინარე, მომხმარებელი შეკვეთის გაკეთებისგან თავს იკავებდა. ახალი კონცეფციის მეშვეობით კი, რუსთავის მოსახლეობას საშუალება მიეცემა, მიტანის ტარიფის გადახდის გარეშე, მარტივად, „მადარტის“ ვებგვერდის, ან ფეისბუქ გვერდის მეშვეობით, შეუკვეთოს და მიიღოს სასურველი პროდუქცია.

„მადარტის“ მარკეტინგის მენეჯერი თათული გულბიანი „ბიზნესპარტნიორთან“ ამბობს, რომ თუ ახალი კონცეფციის სერვისცენტრი გაამართლებს, „მადარტი“ ანალოგიურ ობიექტებს საქართველოს დანარჩენ რეგიონებშიც გახსნის. მისივე ინფორმაციით, რუსთავის სერვისცენტრმა, ამ ეტაპზე, 2 ოპერატორი დაასაქმა, გარდა ამისა, გაჩნდა დამატებითი რესურსი, რომ წარმოებაშიც კიდევ 10 ადამიანი დასაქმებულიყო.

შეგახსენებთ, რომ ამ დრომდე, „მადარტი“ თბილისში 4 წარმოება-რეალიზაციის ფილიალით და ერთი ძირითადი წარმოებით არის წარმოდგენილი. ჩამოთვლილ ობიექტებს, ახლა უკვე, რუსთავის სერვისცენტრიც დაემატა.

კომპანიამ ახალი კონცეფციის ობიექტის გახსნაში 50 000 ლარის ინვესტიცია განახორციელა.