რამზეს იახტა: ამ ეტაპზე 2 ცალი 22 მეტრიანი იახტაა გაყიდული
"იახტების გაყიდვების ტენდენცია მზარდია",- ამის შესახებ გადაცემა „ბიზნესი რუსთავი 2-ს“ იახტების დილერი კომპანია „რამზეს იახტის“ დამფუძნებელმა, გიორგი ჩიკვაიძემ განუცხადა.
მისი ინფორმაციით, იახტების გაყიდვა 2020 წლიდან დაიწყო და დღემდე ჯამში 19 მცურავი ობიექტი გაიყიდა, მათ შორისაა კატერები, დღის კრუიზერები და იახტები.
როგორც ჩიკვაიძე განმარტავს, თავდაპირველად მოთხოვნა მხოლოდ კატერებსა და დღის კრუიზერებზე იყო, შემდეგ კი სარეალიზაციო ქსელს პატარა ზომის იახტა დაემატა, გასულ წელს კი კომპანიამ გასაყიდად 22 მეტრიანი იახტაც გამოიტანა. როგორც ჩიკვაიძე აცხადებს, ამ ეტაპზე ჯამში 2 ცალი 22 მეტრიანი იახტაა გაყიდული.
„აღსანიშნავია, რომ ყველა გაყიდული იახტის მფლობელი არის ქართველი. არიან საშუალო და საშუალოზე მაღალი დონის ბიზნეს წარმომადგენლები, ასევე ადამიანები, რომლებსაც ძალიან უყვართ ეს მიმართულება ან ევროპის სხვადასხვა ქვეყანაში ჰქონიათ შეხება,"- აცხადებს ჩიკვაიძე.
როგორც იახტების დილერი კომპანიის დამფუძნებელი აღნიშნავს, იქიდან გამომდინარე, რომ იახტები განბაჟების პროცედურებისაგან სრულადაა გათავისუფლებული, ბიზნესის ამ სეგმენტის განვითარება საკმაოდ გამარტივებულია.
