რა სახის ჯარიმა დაეკისრებათ რესტორნებს, რომლებიც მუშაობას ნებართვის გარეშე აღადგენენ

მთავარი შრომინსპექტორის, ბექა ფერაძის ინფორმაციით, რესტორნების უმრავლესობა 6 თებერვალს თვითნებურად არ გაიხსნება. ამის თქმის საფუძველს ფერაძეს, როგორც თავად განმარტავს, კერძო სექტორთან კომუნიკაცია აძლევს.

შრომის მთავარი ინსპექტორი ამბობს, რომ საკვები ობიექტების აბსოლუტური უმრავლესობა მთავრობის ეტაპობრივი გახსნის გეგმას მიჰყვება.

“არ შეიძლება ვისაუბროთ, რომ ეს არის რესტორნების აბსოლუტური უმრავლესობა. ეს არის რესტორნების გარკვეული ჯგუფი, რომლებიც მსგავს მოთხოვნებს აყენებენ. ბევრ რესტორანთან გვაქვს კომუნიკაცია, რომლებიც გვეუბნებიან, რომ მათთვის დღეს პრიორიტეტი არ არის მუშაობის აღდგენა. რესტორნების აბსოლუტური უმრავლესობა სრულად იზიარებს მოთხოვნებს და მიჰყვება მთავრობის ეტაპობრივი გახსნის გეგმას. ამ ორი ჯგუფის ინტერესები ერთად უნდა შევაჯეროთ”,- განაცხადა ფერაძემ.

ფერაძემ აქვე განმარტა, რა სახის ჯარიმა დაეკისრებათ რესტორნებს, რომლებიც მუშაობას ნებართვის გარეშე აღადგენენ.

"ბიზნესთან აქტიური კომუნიკაცია გვაქვს. არა მარტო ოფიციალური შეხვედრები, არამედ პირადი კომუნიკაცია მაქვს მათთან. იმედი მაქვს, კვირის ბოლომდე კონსესუსამდე მივალთ და ასეთ რადიკალურ ზომებს არ მიიღებენ. ამის არანაირი საფუძველი არ არსებობს. თუ ამის უკიდურესი აუცილებლობა დადგება, ბუნებრივია სანქციებს გამოვიყენებთ. ეს ფიზიკური პირისთვის 2 000 ლარი, ხოლო იურიდიული პირის მიმართ 10 000 ლარია. განმეორება კი სისხლის სამართლებრივ პასუხისგებას იწვევს",- აღნიშნა ფერაძემ.