რა ახალი პროექტები იწყება ქალი მეწარმეების წასახალისებლად - დეტალები
საქართველოს სავაჭრო-სამრეწველო პალატა, მიმდინარე წლის განმავლობაში, ქალი მეწარმეების წასახალისებლად რამდენიმე ახალ პროექტს განახორციელებს.
როგორც „ბიზნესპარტნიორს“ საქართველოს სავაჭრო სამრეწველო პალატის, ბიზნესის და რეგიონული განვითარების დეპარტამენტის დირექტორმა გიორგი ვეკუამ განუცხადა, ქალი მეწარმეებისთვის იქნება გაცვლითი პროგრამები, ასევე მენტორშიფის ერთგვარი პროგრამები, რომლებსაც საქართველოს სავაჭრო-სამრეწველო პალატა სხვა სავაჭრო პალატებთან ერთად საზღვარგარეთ ახორციელებს.
„ასევე, ქალ მეწარმეებს სრულიად ახალ საერთაშორისო გამოფენებში მონაწილეობას დავუფინანსებთ“, - აღნიშნა გიორგი ვეკუამ.
მისივე ინფორმაციით, ყველა პროექტი, რომელსაც საქართველოს სავაჭრო-სამრეწველო პალატა ახორციელებს - არის უფასო, ამიტომ, საქართველოში რეგისტირებულ ნებისმიერ მეწარმეს შეუძლია მიმართოს ამ პალატას და პროექტებში ჩაერთოს.
„ზოგადად, 2023 წელს საქართველოს სავაჭრო-სამრეწველო პალატა კერძო სექტორს ძალიან ბევრ სიახლეს შესთავაზებს, ამიტომ, ძალიან მნიშვნელოვანია, რომ თვალი მიადევნონ ჩვენს სოციალურ ქსელებს, ჩვენს ვებ-გვერდს“, - განმარტა საქართველოს სავაჭრო სამრეწველო პალატის , ბიზნესის და რეგიონული განვითარების დეპარტამენტის დირექტორმა.
მისივე თქმით, ძირითადი მიმართულებები დარჩება ისევ დიჯიტალიზაცია და ელექტრონული კომერციის განვითარება მცირე და საშუალო ბიზნესში.
