რა აფერხებს საქართველოში როლერ სპორტის განვითარებას - მიზეზები

საქართველოში როლერ სპორტის სწავლება საერთაშორისო სტანდარტებით დაიწყეს.

როგორც „ბიზნესპარტნიორს“ ASSA BLADERS-ის დამფუძნებელმა და სერტიფიცირებულმა ტრენერმა დავით ნამთალაშვილმა განუცხადა, მან გადამზადება მსოფლიოს საუკეთესო როლერებთან გაიარა და პოლონეთში საერთაშორისო სერტიფიკატიც აიღო, რომლითაც არა მხოლოდ საქართველოში, მსოფლიოს ნებისმიერ წამყვან ქვეყანაში შეძლებს სწავლებას.

მისი თქმით, მთელ მსოფლიოში როლიკების ბუმი პანდემიის დროს გააქტიურდა, ბევრი ადამიანისთვის კი ეს ბავშვობის ოცნებაც აღმოჩნდა.

„შესაბამისად, როლერ სპორტით დანტერესებული ადამიანების რიცხვი სულ უფრო მზრდია როგორც დანარჩენ მსფლიოში, ისე საქართველოში. ეს არის სპორტი ნებისმიერი ასაკის ადამიანებისთვის. ყველაზე პატარა ასაკის მოსწავლე 5 წლის მყავს, ყველაზე უფროსი კი 57 წლის ქალბატონი“, - აღნიშნა დავით ნამთალაშვილმა.

მან იმ ბენეფიტებზეც გაამახვილა ყურადღება, რომელსაც როლერ სპორტით დაკავებული ადამიანები იღებენ.

„ამერიკის გულსისხლძარღვთა დაავადების ცენტრის კვლევებით დადასტურდა, რომ როლერ სპორტი გულის გაძლიერებისთვის ერთ-ერთი ნომერ პირველია. ამასთან,  სხვა ბევრი სპორტისგან განსხვავებით, სახსრებზე, მენჯებსა და ხერხემალზე დატვირთვა მინიმალურია. სწორედ ამიტომ, როლერ სკოლის მოსწავლეებისთვის ასაკობრივი შეზღუდვა არ არსებობს და ისინი როგორც ზრდასრული ადამიანები, ისე ბავშვები არიან“, - განმარტა დავით ნამთალაშვილმა.

ASSA BLADERS-ის დამფუძნებელმა იმ გამოწვევებზეც ისაუბრა, რაც საქართველოში როლერ სპორტის განვითარებას აფერხებს და თქვა, რომ ქვეყანაში არ არსებობს გამართული ინფრასტრუქტურა როლერ სპორტისთვის, არ არის გადახურული მოედნები, სადაც უამინდობის დროს ადამიანები როლერ სპორტით დაკავდებიან. შესაბამისად, ისინი დამოკიდებულები არიან ამინდზე. პრობლემას წარმოადგენს ადგილობრივ ბაზარზე ხარისხიანი აღჭურვილობის მოპოვების საკითხიც.

შეგახსენებთ, როლერ სპორტი ექსტრემალური სპორტის ნაირსახეობაა.