პრემიერი: ბიზნესი სწორად აღიქვამს იმ სტაბილურობას, რომელიც ჩვენმა მთავრობამ შექმნა

პრემიერ-მინისტრი ქართული ეკონომიკის ზრდის ტემპით კმაყოფილია.

ირაკლი ღარიბაშვილის შეფასებით, არსებული ვითარებით კმაყოფილია ბიზნესიც. 

"საგარეო ვაჭრობა მნიშვნელოვნად გაუმჯობესდა და ტენდენციები მაისშიც გაგრძელდა. ექსპორტის რეკოდული მოცულობა დაფიქსირდა. განსაკუთრებით აღსანიშნავია რეგიონში შექმნილი უბედურების ფონზე, რომ ყველა მიმართულებით გვაქვს ზრდა. ექსპორტი, ტურიზმი და გვაქვს ორნიშნა ეკონომიკური ზრდა, რაც უპრეცედენტოა და იშვიათობაა. ამ ყველაფერს ემატება პოზიტიური მაჩვენებლებიც. არსებული გამოწვევების და საგარეო გამოწვევების ფონზე ექსპორტი 48.4%-ით გაიზარდა და $504 მილიონი შეადგინა, ხოლო იანვარ-მაისში ექსპორტი გაიზარდა 36%-ით და $2 მილიარდი შეადგინა. 

პირველ კვარტალში გვქონდა რეკორდული პირდაპირი უცხოური ინვესტიციების მოცულობა, რომელიც ოთხჯერ არის გაზრდილი და შეადგინა $568 მილიონი. იმ ფონზე, როდესაც ასეთი გამოწვევებია მთელ მსოფლიოში, ეს მართლაც რეკორდია. მთელი ბიზნესი მოტივირებულია. ბიზნესი სწორად აღიქვამს იმ სტაბილურობას და პროგნოზირებადობას, რომელიც ქვეყანაში ჩვენმა მთავრობამ შექმნა",- აღნიშნა პრემიერმა.