პირველად საქართველოში, მამაკაცის პარიკების წარმოება დაიწყება
პირველად საქართველოში, ნატურალური თმით, მამაკაცის პარიკების წარმოება დაიწყება. პროექტზე სოციალური საწარმო „პარიკების ოთახი“ მუშაობს.
როგორც „ბიზნესპარტნიორს“ „პარიკების ოთახის“ თანადამფუძნებელმა, გვანცა ინასარიძემ განუცხადა, ქართული წარმოების მამაკაცის პარიკები ბაზარზე 2024 წლიდან გამოჩნდება.
„მანამდე ველოდებით ჩინეთიდან უახლესი დანადგარების ჩამოსვლას, რომლითაც ჩვენი საწარმო აღიჭურვება და მისი წარმადობაც გაიზრდება. მოგეხსენებათ, ამ ეტაპზე, ბუნებრივი თმით, მხოლოდ ქალბატონების პარიკებს ვაწარმოებთ და თანამედროვე დანადგარებით, ეს პარიკებიც კიდევ უფრო დაიხვეწება“, - აცხადებს გვანცა ინასარიძე.
„პარიკების ოთახის“ თანადამფუძნებელი საქართველოში არსებულ კონკურენციასა და პარიკების ბიზნესზეც საუბრობს და აღნიშნავს, რომ ჯერჯერობით, ქვეყანაში მხოლოდ 2 კომპანიაა, რომლებიც ქალბატონებისთვის ნატურალური თმით პარიკებს აწარმოებთ. მათ შორის, ერთ-ერთი "პარიკების ოთახია".
"მამაკაცის ხაზის მიმართულებით პირველები ვიქნებით. გვინდა, რომ ჩვენი წარმოებით ბაზარზე არსებული მზარდი მოთხოვნა სრულად დავაკმაყოფილოთ. ამჟამად, ქართული ბაზარი უმეტესად იმპორტირებული პარიკებითაა გაჯერებული - ძირითადად, ჩინეთიდან, აშშ-დან და ისრაელიდან, თუმცა, ისინი ხელოვნური თმითაა დამზადებული. აქედან გამომდინარე, ჩვენი პარიკები გამძლეობით და ხარისხით უმჯობესია. ამასთან, ფასიც კონკურენტუნარიანი გვაქვს“, - აღნიშნავს „ბიზნესპარტნიორთან“ გვანცა ინასარიძე.
მისივე ინფორმაციით, „პარიკების ოთახი“ ბაზარზე სულ 1 წელია გამოჩნდა და მისი გაყიდვების მაჩვენებელი ყოველთვიურად მზარდია. სოციალური საწარმო თბილისთან ახლოს, სოფელ გამარჯვებაში მდებარეობს.
