Piel Naturals-მა ქართული ყურძნის წიპწის ზეთისგან თავის მოვლის ახალი ხაზი შექმნა
თავის მოვლის 100%-ით ნატურალური საშუალებების მწარმოებელმა კომპანია Piel Naturals-მა ქართული ყურძნის წიპწის ზეთისგან ახალი ხაზი შექმნა.
კომპანიის დამფუძნებელი თათუკა ლომაძე "ბიზნესპარტნიორთან" ამბობს, რომ წელს Piel Naturals-ის ყველაზე დიდი სიახლე სწორედ ქართული ენდემური ყურძნის წიპწის ზეთისგან წარმოებული პროდუქტებია.
"1 წელზე მეტია ახალი ხაზის შექმნაზე ვმუშაობთ, ჩვენთვის ძალიან საამაყოა, რომ ქართული ნედლეულისგან ვამზადებთ თავისა და ტანის მოვლის საშუალებებს. მინდა აღვნიშნო, რომ ყურძნის წიპწის ზეთის პროდუქტების ნაწილი უკვე გაყიდვაშია. მაგალითად, თვალის კრემი, ტანის ლოსიონი, ზეთი, ასევე ახლა ფორმულების დამუშავების და დახვეწის პროცესში ვართ და სულ მალე ბევრ საინტერესო პროდუქტს დავამატებთ.
წიპწის ზეთს ადგილობრივი მწარმოებელი "შატო ზეგაანი" გვაწვდის, რომელიც არაჩვეულებრივადაა დამზადებული. პროდუქცია გათვლილია როგორც ქალისთვის, ასევე მამაკაცებისთვის. მომხმარებელმა ეს სიახლე კარგად მიიღო და ყურძნის წიპწის ხაზი უკვე ძალიან მოთხოვნადია", – აღნიშნავს თათუკა ლომაძე.
მისივე თქმით, Piel naturals-ს უკვე აქვს თმის მოვლის საშუალებები, თუმცა კომპანია აქტიურად მუშაობს პროდუქციის გამრავალფეროვნებაზე და მომავალში შამპუნების შრატებისა და კონდიციონერების წარმოებას გეგმავს, რომელიც მომხმარებლისთვის სიახლე, ხოლო ქართული ბაზრისთვის ინოვაციური იქნება.
"ზოგიერთ ფიქრობს, რომ ჩვენი პროდუქცია მხოლოდ ცხიმის ბაზაზეა დამზადებული. მინდა აღვნიშნო, რომ მოვერგეთ იმ მომხმარებლის მოთხოვნებს, რომელსაც არ მოსწონს ცხიმოვან ბაზაზე დამზადებული საცხები და დავამატეთ წყლის ბაზაზე დამზადებული თავის მოვლის საშუალებების ხაზიც," – ამბობს კომპანიის დამფუძნებელი.
ინფორმაციისთვის, Piel Naturals-ი ამ ეტაპზე თბილისში 7, ბათუმში 1 და ქუთაისში 1 ლოკაციაზეა წარმოდგენილი. აღსანიშნავია, რომ 2021 წლამდე კომპანია მხოლოდ 3 სარეალიზაციო სტენდით შემოიფარგლებოდა.
