ოკტოპუსი: ცალკე ბანკს ველაპარაკებით, ცალკე შემოსავლების სამსახურს რომ მუშაობა განვაახლოთ
„ოკტოპუს-ფიტნეს კლუბში“ ამ ეტაპზე არ იციან შეძლებენ თუ არა 15 მარტს მუშაობის განახლებას. როგორც კომპანიის დირექტორი გიორგი ასათიანი „ბიზნესპარტნიორთან“ აცხადებს, კომპანიამ იმისთვის, რომ გახსნა შეძლოს, დაახლოებით 200 000 ლარის მოზიდვაა საჭირო.
„გვაქვს როგორც საგადასახადო, ისე მომწოდებლების დავალიანებები, რომლის გადასახდელადაც ცალკე ბანკს ველაპარაკებით, ცალკე - შემოსავლების სამსახურს, რომ როგორმე ფუნქციონირება განვაახლოთ. ამის გამო ვაპირებთ ბანკიდან დამატებით სესხი ავიღოთ. დღეს არ გვაქვს ეს ფინანსები, თუმცა, მაქსიმალურად ვემზადებით საორგანიზაციო ნაწილში, იმედია, რომ ამ ერთ კვირაში მოვიძიებთ თანხას და გახსნას შევძლებთ, თუმცა, დარწმუნებულები არ ვართ,“ - აცხადებს ასათიანი.
მთავრობის გადაწყვეტილებით, სპორტული დარბაზები 15 მარტიდან მუშაობას განაახლებენ.
ქვეყნის მასშტაბით შეზღუდვები 2020 წლის 28 ნოემბრიდან დაწესდა.
