ოკტოპუს ფიტნეს კლუბი: ასეთ აქტივობას არ ველოდით

„ოკტოპუს ფიტნეს კლუბის“ ყველა ფილიალი გაიხსნა. კომპანიის დირექტორი გიორგი ასათიანი „ბიზნესპარტნიორთან“ დღეიდან მუშაობის განახლებას აფასებს და აცხადებს, რომ მოსახლეობის აქტივობამ მოლოდინს გადააჭარბა.

მისი ინფორმაციით, კომპანიამ მუშაობის განახლება დამატებითი ფინანსური სახსრების მოზიდვით შეძლო. საუბარია, დაახლოებით 200 000 ლარზე.

„დიდი აქტივობაა დილიდან, კოვიდამდე პერიოდში, დილით ასეთი მომართვიანობა არასოდეს ყოფილა. დღეს ყველა ფილიალში ადამიანების  საკმაოდ დიდი რაოდენობა იყო მოსული. მგონია, რომ პანდემიამ კიდევ უფრო შთანერგა ადამიანებში, რომ ჯანსაღი ცხოვრების წესი კიდევ უფრო მნიშვნელოვანია. ამხელა მომართიანობას არ ველოდით, ყველა მოლოდინს გადააჭარბა,“ - აცხადებს ასათიანი.

მისი განმარტებით, „ოკტოპუს ფიტნეს კლუბში“ ფასები არ შეცვლილა, რადგან კომპანია ქვეყანაში არსებულ ეკონომიკურ კრიზისს ითვალისწინებს.

როგორც ასათიანი აღნიშნავს, დღეს სპორტ დარბაზებში მისული მომხმარებელი ძირითადად 1 თვიან პაკეტებს ყიდულობს. მოთხოვნადია როგორც 3 და 6 თვიანი, ისე 1 წლიანი აბონიმენტებიც. 

„არამარტო ძველი და ერთგული  მომხმარებელი დაგვიბრუნდა, არამედ, ბევრი ახალი მომხმარებელიც დარეგისტრირდა,“ - აცხადებს გიორგი ასათიანი.

მისივე განმარტებით, ასეთი აქტივობის პირობებშიც კი კომპანია პანდემიამდე ნიშნულს მინიმუმ 2 წელი ვერ დაუბრუნდება.

ასათიანის განცხადებით, ამ დროისთვის ახალ პროექტებზე  საუბარი არ არის. მომავალ კვირას კი კომპანია აპირებს მიმართოს ფინანსთა სამინისტროს, რათა საგადასახადო შეღავათები სპორტული დარბაზების ინდუსტრიაზეც გავრცელდეს. საუბარია, 4 თვის საშემოსავლო გადასახადის ჩამოწერაზე.

მთავრობის გადაწყვეტილებით, სპორტულმა დარბაზებმა მუშაობა დღეიდან განაახლეს.  ქვეყნის მასშტაბით შეზღუდვები 2020 წლის 28 ნოემბრიდან დაწესდა.