ნიკა მამუკელაშვილი: საქართველოში პრემიუმ ხარისხის ხილის და ბოსტნეულის ნატურალურ წვენებს აწარმოებენ
საქართველოში პრემიუმ ხარისხის ხილის და ბოსტნეულის ნატურალურ წვენებს აწარმოებენ. ამის შესახებ სააგენტოს "აწარმოე საქართველოში" ექსპორტის დეპარტამენტის ხელმძღვანელი ნიკა მამუკელაშვილი აცხადებს.
მისი თქმით, ეს კომპანიები ექსპორტზე წარმატებით გადიან.
"კომპანიები, რომლებიც ამერიკაში ექსპორტზე გადიან, პრემიუმ ხარისხის ხილის და ბოსტნეულის ნატურალურ წვენს აწარმოებენ - ეს შეგვიძლია ყოველგვარი გადაჭარბების გარეშე ვთქვათ. რამდენიმე კომპანია, წლების განმავლობაში, ამ ხაზს საერთოდ არ ყიდდა საქართველოში და ორიენტირებული იყო საექსპორტო ბაზარზე. ადგილობრივმა მოსახლეობამ არც კი ვიცოდით ამ კომპანიების არსებობა საქართველოს ბაზარზე", - აღნიშნა ნიკა მამუკელაშვილმა "ბიზნესი რუსთავი 2"-თან სტუმრობისას.
მან ნიუ-იორკში საკვები და სასმელი პროდუქტების ყოველწლიური გამოფენაც შეაფასა, სადაც პირველად საკუთარი პროდუქცია 16-მა ქართულმა კომპანიამ წარადგინა.
მისი თქმით, გამოფენის ფარგლებში, ქართველ მწარმოებელსა და საერთაშორისო შემსყიდველს შორის 200-მდე ბითუბი შეხვედრა გაიმართა.
"მნიშვნელოვანია აღინიშნოს, რომ რეგისტრირებული და ავტორიზებული საერთაშორისო ვიზიტორების და შემსყიდველების რიცხვი აჭარბებდა 47 000-ს. ნაწილი ესტუმრა სტენდს, ნაწილმა გამართა მოლაპარაკება ქართველ მწარმოებელთან, ნაწილმა დაათვალიერა და მოინიშნა, რომ საქართველო იღებდა მონაწილეობას.
საქართველოში იწარმოება კვალიფიციური, საერთაშორისო სტანდარტების შესაბამისი პროდუქცია, ღვინის გარდა, სადაც ჩვენ ამერიკის ბაზარზე დაახლოებით 30%-იანი ზრდა გვაქვს. სხვადასხვა პერსპექტიული პროდუქტი გვაქვს, როგორიცაა თხილი და თხილის პროდუქტები, ხილის და ბოსტნეულის ნატურალური წვენები, მტკნარი და მინერალური წყლები, ჩაი, ჩირეული, რომელმაც მოწონება დაიმსახურა",- აცხადებს ნიკა მამუკელაშვილი.
როგორც მან აღნიშნა, გამოფენაზე დიდი ინტერესი იყო საქართველოში წარმოებულ ხილის და ბოსტნეულის წვენებზე.
"რამდენიმე კომპანია ამერიკის ბაზარზე უკვე კარგად არის პოზიციონირებული. ხილის და ბოსტნეულის ნატურალური წვენების მიმართულებით ჩვენ შეგვიძლია ვთქვათ, რომ საქართველოში დაახლოებით 10-15 კომპანიაა, რომელიც ძალიან მაღალი დონის წვენს და სხვადასხვა პროდუქტს აწარმოებს. ისინი ფლობენ საერთაშორისო სტანდარტს, სერტიფიკატს, რომელიც არის ერთგვარი სავიზიტო ბარათი, იმისათვის, რომ შეხვიდე საერთაშორისო ბაზრებზე, მათ შორის ევროკავშირში, ჩინეთში, ამერიკაში, კანადაში და ყველა იმ სამიზნე ბაზარზე, სადაც ჩვენ გვინდა მოხვედრა", - აცხადებს ნიკა მამუკელაშვილი.
