"ნატურინო" ჯანსაღი პროდუქტების სასაჩუქრე "ბოქსებს" შექმნის
წარმოების გაზრდა და პროდუქტთა ფართო ასორტიმენტის შექმნა ყველა სეზონისთვის, საბითუმო ხაზის განვითარება რესტორნებისთვის, სასტუმროებისთვის და ა.შ, ეფექტური მიწოდების ჯაჭვის აწყობა, რამაც საბოლოო ჯამში უნდა გააიაფოს პროდუქტი, - ეს იმ გეგმების მცირე ჩამონათვალია, რომელიც ნატურალური პროდუქტების მწარმოებელ ბრენდ „ნატურინოს“ აქვს.
როგორც „ბიზნესპარტნიორს“ კომპანიის დამფუძნებელმა თამარ კაპანაძემ განუცხადა, „ნატურინოს“ სამომავლო გეგმებში ასევე შედის სასაჩუქრე „ბოქსების“ შექმნა ჯანსაღი პროდუქტებით.
„გარდა ამისა, ვაპირებთ შეფუთვის ინოვაციური მეთოდების გამოყენებას. ასევე დიდი სურვილი გვაქვს „შოურუმის“ გაკეთების“, - აღნიშნა „ნატურინოს“ დამფუძნებელმა.
ცნობისთვის, ქართულ ბაზარზე ახალი ბრენდი „ნატურინო“ გასულ წელს გამოჩნდა. ის მომხმარებელს სხვადასხვა სახის ნატურალურ პროდუქციას სთავაზობს, მათ შორისაა: ხილი და ბოსტნეული (მხოლოდ ქართული), თხილეული, ჩირეული, მწნილეული, ასევე ისეთი პროდუქტები, როგორებიცაა: ჩურჩხელა, სოფლის კვერცხი, ლობიო და ა.შ.
„ნატურინოს“ პროდუქტების ძირითადი ნაწილი წარმოებულია გორის რაიონის სოფელ კარბში, რომელიც ოკუპირებული ტერიტორიის გამყოფი ხაზის მიმდებარე სოფელია და ასევე, განეკუთვნება მაღალმთიან რეგიონს.
