მოდური აქსესუარები ნარჩენებისგან - Plasticwatcher-ი მომხმარებლებს ახალ პლატფორმას შესთავაზებს

ოჯახებიდან საყოფაცხოვრებო ნარჩენების, ბიზნეს ორგანიზაციებიდან ვადაგასული სარეკლამო ბანერების და “როლ აპების” შეგროვებით, შემდგომ მათი სამკერვალო მასალად გარდაქმნით და გამოყენებით, plasticwatcher.ge მდგრადი მოდის ნივთებს და სხვადასხვა აქსესუარებს ქმნის.

საწვიმრებს, ქუდებს, ფანქრების ჩასადებს და სხვა. დაზიანების შემთხვევაში, თქვენ თავად, მარტივად შეგიძლიათ მათი შეკეთება, ე.წ. “პერგამენტის” ქაღალდის და უთოს დახმარებით. მდგრადი მოდის ნივთის მთავარი დანიშნულება არის, ის რომ იგი ისევ ნარჩენად არ გადაიქცეს, არამედ ის დროსთან ერთად  გაქრეს, მოხმარებაში გაილიოს. ამგვარად plasticwatcher–ის მიზანია ხმა მივაწვდინოთ ადამიანებს, რათა ისინი დაფიქრდნენ, ვიდრე პოლიეთილენის პარკით და პლასტიკის ბოთლებით გარემოს ზიანს მიაყენებენ.

plasticwatcher.ge–ს დამფუძნებელი ეკა ასათიანი „ბიზნესპარტნიორთან“ ამბობს, რომ კომპანია ზრუნავს პოლიეთილენის პარკების და საოჯახო პროდუქტების შესაფუთი ნარჩენებით დაბინძურების შემცირებაზე, რომლის მიზანი ადამიანების შთაგონებაა, რომ გარემოზე ნეგატიური ზემოქმედების ქცევა შეიცვალოს და მოახდინოს ე.წ. Zero Waste ცხოვრების სტილის სტიმულირება.

„ერთი წლის წინ, გავიმარჯვეთ თიბისი ბანკის პროექტში, რომელიც სოციალურ პასუხისმგებლობას ეხებოდა. ერთ–ერთი პრიზი იყო ვებ–გვერდით უზრუნველყოფა. 6 თვეა ვმუშაობთ ამაზე და ძალიან მალე მომხმარებელს ახალ საერთაშორისო პლატფორმას შევთავაზებთ, სადაც გასაყიდი პროდუქციის გარდა განთავსდება ინფორმაცია ცნობიერების ასამაღლებლად და ორიენტირებული იქნება ადამიანების განვითარებასა და ქცევის ცვლილებაზე. თავიდან ეს ყველაფერი სახლში დაიწყო, როდესაც პოლიეთილენისგან ნაჭრის მსგავსი მასალის მიღება ვცადე და გავაკეთე ჩანთა. ამის შემდეგ საქართველოს ბანკის სოციალური მეწარმეობის კონკურსში, „სიცოცხლის ხე“, შევიტანეთ განაცხადი, სადაც გავიმარჯვეთ, მოვიპოვეთ დაფინანსება და შევიძინეთ საჭირო დანადგარები, საკერავი მანქანა, თერმო პრესი და ა.შ.“ – აღნიშნავს კომპანიის დამფუძნებელი ეკა ასათიანი.