მიმდინარე კვირის განმავლობაში ნორვეგიული ორაგული ჰიპერმარკეტებში შევა

მიმდინარე კვირის განმავლობაში, ნორვეგიული ორაგული ჰიპერმარკეტების ქსელ „კარფურსა“ და „აგროჰაბში“ შევა. ამის შესახებ „ბიზნესპარტნიორთან“ „გურია ფიშ ფარმინგის“ დამფუძნებელმა, გიორგი ჩხაიძემ განაცხადა.

მისი ინფორმაციით, საწყის ეტაპზე ჰოპერმარკეტები საცდელი რაოდენობის ნორვეგიული ორაგულით მომარაგდებიან.

„სატესტო პარტიების გაგზავნის შემდეგ, ადგილობრივ ბაზარზეც აღიარეს, რომ ჩვენი პროდუქცია ნორვეგიული ორაგულის იდენტურია და ანალოგიური ხარისხისაა. რაც შეეხება ფასს,  ფასითაც ბაზარზე კონკურენტუნარიანები ვართ. „ -აცხადებს ჩხაიძე.

მისივე ცნობით,კომპანია აქტიურ მოლაპარაკებებს ყაზახეთთან, აზერბაიჯანთან და ემირატებთან აწარმოებს, სადაც ექსპორტი 2024 წლიდან განხორციელდება. ამ ეტაპზე ტექნიკური საკითხებია მოსაგვარებელი, უნდა გაიგზავნოს საცდელი პარტიებიც.  

როგორც „გურია ფიშ ფარმინგის“ დამფუძნებელი ვარაუდობს, გაყიდვების 60% ექსპორტი იქნება, ხოლო 40% ადგილობრივი ბაზარი. პროდუქცია კი „გურია ფიშის“ სახელით გაიყიდება.

რაც შეეხება HoReCa სექტორთან თანამშრომლობას, ჩხაიძე აღნიშნავს, რომ ნორვეგიული ორაგულის მთელი წლის განმავლობაში მიწოდება ვერ ხდება, შესაბამისად,სამასპინძლო სექტორის მომარაგება სავარაუდოდ, შუამავალი კომპანიების მეშვეობით მოხდება, რომლებიც პროდუქციის რეალიზაციას მოახდენენ.

ამას გარდა, კომპანია 3 წლის ჭრილში, ნორვეგიული ორაგულის გადამამუშავებელი საწარმოს გახსნას გეგმავს, სადაც ნორვეგიული ორაგულის ფილე დამზადდება.

შეგახსენებთ, კომპანია გრიგოლეთში მდებარეობს. პროექტის ღირებულება 8,5 მლნ ლარია, საიდანაც 5 მლნ ლარი დაფინანსებულია პროგრამის "აწარმოე საქართველოში" ფარგლებში. პროექტი გათვლილია 5 წელზე და კომპანიის მენეჯმენტი ჯამში 200 მლნ ლარის ინვესტირებას გეგმავს. მეურნეობაში 18 ადამიანია დასაქმებული.