მიხო სვიმონიშვილის კომპანიამ იოგურტის წარმოება დაიწყო

დმანისში შვეიცარიულ-ქართული ტექნოლოგიით იოგურტის წარმოება დაიწყო. პროექტს შვეიცარიული აგრარული სკოლა “კავკასია“ ახორციელებს, რომლის დამფუძნებელი სოფლის მეურნეობის ყოფილი მინისტრი და "მარგებელი ჰოლდინგის" მფლობელი მიხო სვიმონიშვილია.

როგორც „ბიზნესპარტნიორს“ სკოლა „კავკასიის“ დირექტორმა თინათინ მახარაძემ განუცხადა, ამ ეტაპზე, 1 სახეობის იოგურტს აწარმოებენ, რომელიც დანამატებს არ შეიცავს და აბსოლუტურად ნატურალურია.

„ჩვენი იოგურტი სარეალიზაციო  ქსელში მიმდინარე წლის ზამთრიდან ჩაეშვა.  ის ყველა იმ ობიექტში იყიდება, სადაც ჩვენი სხვა პროდუქცია, მათ შორის - „გუდვილის“ ქსელში. იოგურტი ჩამოსხმულია, მაწვნის მსგავსად, 360 მლ-იან ქილებში, თუმცა მაწონზე ძვირი ღირს და მაღალ საფასო სეგმენტში გადის“,- აღნიშნა თინათინ მახარაძემ.

მისივე განმარტებით, „კავკასიას“ იოგურტი, რომელიც ამავე ბრენდის ქვეშ იყიდება, იშვიათი პროდუქტია ქართულიი ბაზრისთვის, რადგან იოგურტი დანამატების გარეშე, საქართველოში დეფიციტურია. „სწორედ ამიტომ, მასზე მოთხოვნა საკმაოდ მზარდია“, - განარტა მახარაძემ.

მისივე თქმით, შვეიცარიული აგრარული სკოლა, ამჟამად, იოგურტების ახალი სახეობის დამატებას არ გეგმავს, თუმცა, ზაფხულიდან კარაქის წარმოებას აპირებს.

შეგახსენებთ, დმანისის მუნიციპალიტეტში, სოფელ სარკინეთში  შვეიცარული პროფესიული განათლების მოდელის მიხედვით, სკოლა და საცხოვრებელი კამპუსი ფუნქციონირებს. სკოლის ბაზაზევე, შვეიცარიული ტექნოლოგიით 5 დასახელების ყველი იწარმოება, რომელიც სარეალიზაციო ქსელში 2022 წლიდან გამოჩნდა.