მიხო სვიმონიშვილი დმანისში შვეიცარიულ-ქართული ტექნოლოგიით ყველის წარმოებას იწყებს
დმანისში შვეიცარიულ-ქართული ტექნოლოგიით ყველის წარმოება იწყება.
პროექტს ახორციელებს შვეიცარიული აგრარული კოლეჯი “კავკასია“, რომლის დამფუძნებელი სოფლის მეურნეობის ყოფილი მინისტრი და "მარგებელი ჰოლდინგის" მფლობელი მიხო სვიმონიშვილია. პროექტს ბიზნესმენი შვეიცარიელ პარტნიორებთან ერთად ახორციელებს.
შვეიცარიული სტანდარტების შესაბამისი თანამედროვე ყველის ქარხანა აპრილში გაიხსნება.
როგორც „ბიზნესპარტნიორს“ კოლეჯის დირექტორმა თინათინ მახარაძემ განუცხადა, ქარხნის მშენებლობა უკვე დასრულებულია, მიმდინარეობს მანქანა-დანადგარების მონტაჟი.
მახარაძის განმარტებით, ქარხანა რძის პროდუქტების სრული ასორტიმენტის წარმოებას შეძლებს, თუმცა საწყის ეტაპზე 10-ზე მეტი სახეობის ყველის წარმოება იქნება შესაძლებელი. მათ შორის იქნება როგორც ქართული, ისე შვეიცარული ყველის სახეობები.
მისი განცხადებით, საწყის ეტაპზე დაგეგმილია ყველის ადგილობრივ ბაზარზე რეალიზაცია, სამომავლოდ კი დმანისში წარმოებული ყველი ექსპორტზეც გავა. სატესტო პარტიის წარმოება მიმდინარე წლის ზაფხულში დაიწყება. რაც შეეხება ბრენდს, შესაძლოა მისი გაყიდვა „კავკასიის“ სავაჭრო ნიშნით მოხდეს.
შვეიცარიული აგრარული კოლეჯი “კავკასია“ პირველ სტუდენტებს სექტემბერში მიიღებს. მიმდინარეობს მუშაობა და უახლოეს დღეებში „კავკასია“ ავტორიზაციის მისაღებად განაცხადს განათლების სამინისტროში შეიტანს.
დმანისის მუნიციპალიტეტში, სოფელ სარკინეთში შვეიცარული პროფესიული განათლების მოდელის მიხედვით კოლეჯი და საცხოვრებელი კამპუსი უკვე აშენებულია.
