მერია ვარკეთილის მესამე მასივის ავარიული სახლების ჩანაცვლების პროგრამას დაიწყებს

თბილისის მერია ბიზნესს ავარიუსი სახლების ჩანაცვლების პროგრამას სთავაზობს. 

თბილისის მერის მოადგილის ირაკლი ხმალაძის განცხადებით, განხორციელდება ვარკეთილის მესამე მასივის განახლების პროგრამა. 

მისი თქმით, ეს არის 72 ჰა. ტერიტორიაზე გაშენებული თბილისის ერთ-ერთი ყველაზე ავარიული უბანი, სადაც 5 000-ზე მეტი ოჯახი ცხოვრობს, შენობების ჯამური რაოდენობაა 401. მათ შორის 166 ავარიული შენობაა.

"ამ პროექტის ჩანაცვლების კონცეფცია შევიმუშავეთ, რომელიც შედგება როგორც ვიზუალური გეგმარებისგან, ასევე ეკონომიკურად გამართული მოდელირებისგან. ტერიტორია დაყოფილია 15 სექტორად, სადაც შესაძლებელია 15 გრგ არეალის დამუშავება დეველოპერული კომპანიების მიერ. მათ ეძლევათ თანაბარი ეკონომიკური პარამეტრები და შესაძლებლობები", - აღნიშნა ირაკლი ხმალაძემ. 

მერის მოადგილის ინფორმაციით, ტერიტორიის მთლიანი სამშენებლო მოცულობა შეადგენს 750 000 კვ.მ-ს, ხოლო მთლიანად პროექტის ეკონომიკური ბრუნვაა 0.5 მლრდ დოლარი. 

"ავარიული სახლების ჩანაცვლების პროგრამა გახლავთ საბინაო ფონდის განახლების, ურბანული ქსოვილების გაჯანსაღების პროგრამა, ასევე არის სოციალური პროგრამა, ვინაიდან ის ითვალისიწნებს ჩვენი მოქალაქეების ქონებრივი მდგომარეობის გაუმჯობესებას, მათ კეთილდღეობას. ჩვენ ამ პროგრამას ვახორციელებთ სამშენებლო კომპანიებთან ერთად. ეს არის უსაფრთხო და სტაბილური პარტნიორობის მოდელი, რომელსაც ჩვენ მათ ვთავაზობთ. თავად მუნიციპალიტეტი მოამზადებს სამშენებლოდ თითოეულ პროექტს და ტენდერის საფუძელზე გადასცემს გამარჯვებულ კომპანიას, რომელსაც არ უწევს არანაირი ბიუროკრატიული პროცედურების გავლა - არც პროექტის მომზადება, არც მშენებლობის ნებართვის მიღება. გადაეცემა მას კონკრეტული პროექტი და უნდა დაიწყოს მისი განხორციელება",- განაცხადა ირაკლი ხმალაძემ.