მეჰმედ მელექი: წლის ბოლომდე ქვეყნის მასშტაბით, თურქული Ozdilek-ის კიდევ 4 მაღაზია გაიხსნება
Ozdilek-ის ბრენდის მაღაზიები, ბათუმის შემდეგ, უკვე თბილისსა და რუსთავშიც გაიხსნა. როგორც „ბიზნესპარტნიოს“ კომპანია „ტექნო ჰაუსის“ დირექტორმა მეჰმედ მელექმა განუცხადა, ამ ეტაპზე, Ozdilek-ის თურქული საოჯახო ტექსტილის შეძენა მომხმარებელს დედაქალაქში შემდეგ სავაჭრო ცენტრებში შეუძლია: „ისთ-ფოინთი“, „გლდანი მოლი“, „სითი მოლი“.
მისი თქმით, ამ ეტაპზე, Ozdilek-ის ბრენდის მაღაზიის გახსნაზე მოლაპარაკებები მიმდინარეობს „გორი მოლთანაც“.
„გარდა ამისა, გვინდა რომ ბათუმში Ozdilek-ის კიდევ ერთი მაღაზია დავამატოთ და ამაზეც ვმუშაობთ აქტიურად. თუ მოვასწარით, წლის ბოლომდე თურქული საოჯახო ტექსტილის ბრენდის , Ozdilek-ის კიდევ 4 მაღაზიას გავხსნით საქართველოში“, - აღნიშნა მეჰმედ მელექმა.
„ტექნო ჰაუსის“ დირექტორის განმარტებით, საქართველოს ბაზარზე თურქული ტექსტილი საკმაოდ კარგი რეპუტაციით სარგებლობს და შესაბამისად, მზარდია Ozdilek-ის ცნობადობა და მისი გაყიდვების მაჩვენებელიც.
„ჯერ ძალიან ახალია ეს პროდუქტი ქართველი მომხმარებლისთვის,თუმცა, დარწმუნებულები ვართ, რომ Ozdilek სამომავლოდ საქართველოში ყველაზე მოთხოვნად და გაყიდვად საოჯახო ტექსტილის ბრენდების სამუელში მოხვდება“, - განუცხადა „ბიზნესპარტნიოს“ მეჰმედ მელექმა.
შეგახსენებთ, კომპანია „ტექნო ჰაუსმა“, რომელიც საქართველოში საყოფაცხოვრებო ტექნიკის ბრენდ BEKO-ს წარმოადგენს, საოჯახო ტექსტილის ბიზნესში აქტიურად შესვლა, გასულ წელს გადაწყვიტა. კომპანიამ ბიზნესის გაფართოება ბათუმიდან დაიწყო და ახლა უკვე Ozdilek-ის პროდუქციას თბილისსა და რუსთავშიც ყიდის.
პროექტში, საწყის ეტაპზე, $600 000-ის ინვესტიცია ხორციელდება. მეჰმედ მელექი ამბობს, რომ ეს ნიშა საქართველოში თავისუფალია და საოჯახო ტექსტილი ძალიან მოთხოვნადი პროდუქტია.
