"მანნამ" თხილეულის წარმოება დაიწყო

სოფლის მეურნეობის პროდუქტების გადამამუშავებელმა და დამფასოებელმა კომპანია „მანნამ“ თხილეულის წარმოება დაიწყო. როგორც კომპანიაში „ბიზნესპარტნიორს“ განუცხადეს, უკვე გაყიდვაშია ბლანშირებული და მოხალული თხილი, რომელიც მსხვილ სავაჭრო ქსელებში იყიდება.

“მანნას“ ბრენდით წარმოებული თხილი 80 გრამიან შეფუთვაშია და მისი ფასი „აგროჰაბში“  6.95 ლარია. კომპანია ნედლეულს ადგილობრივი მომწოდებლებიდან (ძირითადად, სამეგრელო) იბარებს. მათივე განცხადებით, პროდუქტით უკვე დაინტერესდნენ ინგლისსა და ჩეხეთში.

რამდენიმე თვეში კომპანია დაფასოებული სახით ნუშის და ნიგოზის  გამოშვებასაც გეგმავს.

თანამედროვე ტექნოლოგიებით აღჭურვილი სოფლის მეურნეობის პროდუქტების გადამამუშავებელი და დამფასოებელი საწარმო „მანნა“ 2017 წელს გაიხსნა, თუმცა, პროდუქცია სარეალიზაციო ქსელში 2018 წლიდანაა. კომპანიის საკუთრებაშია თანამედროვე ინფრასტრუქტურითა და დანადგარებით აღჭურვილი ქარხანა სოფელ საგურამოში.

თხილეულის გარდა, ქარხნის წარმადობა თვეში ამ ეტაპზე 8 ტონა ჩაის გადამუშავებაა, ეს კი სრული დატვირთვის დაახლოებით 30-40%-ია.