"მამუკელაშვილების მარანი" 2024 წლის გაზაფხულზე სასტუმროს გახსნას გეგმავს
„მამუკელაშვილების მარანი“ 2024 წლის გაზაფხულზე სასტუმროს გახსნას გეგმავს, - ამის შესახებ „ბიზნესპარტნიორთან“ მარნის თანადამფუძნებელმა, თეა მახათელაშვილმა განაცხადა.
აღსანიშნავია, რომ მარანი თელავში მდებარეობს, სასტუმრო კი მარნის ტერიტორიაზე განთავსდება. მახათელაშვილის ინფორმაციით, სასტუმროსთვის განკუთვნილი შენობა მათივე საკუთრებას წარმოადგენს. სწორედ აღნიშნული ობიექტის ინფრასტრუქტურული მოწყობაა დაგეგმილი.
იქიდან გამომდინარე, რომ სტუმრების მხრიდან ადგილზე დარჩენის დიდი მოთხოვნაა, სასტუმროს გახსნამდე, "მამუკელაშვილის მარანში" მისულ სტუმარს სურვილის შემთხვევაში რომელიმე ადგილობრივ სასტუმროში განთავსებას შესთავაზებენ.
ამ ეტაპზე, „მამუკელაშვილების მარანს“ 10 ადამიანის სრულყოფილად მასპინძლობა შეუძლია, რაშიც შედის ფოტოსესია, ღვინის დეგუსტაცია, ამასთან ფოლკლორული ანსამბლის გასართობი სანახაობა და სხვა.
„სასტუმრო ბუტიკური სტილით, 3-4 ნომრიანი იქნება. მის მოსაწყობად კი დაახლოებით 50 000-60 000 ლარის ინვესტიცია იქნება განსახორციელებელი,"- აცხადებს მახათლაშვილი.
როგორც მარნის თანადამფუძნებელი აღნიშნავს, სტუმრების მხრიდან მარანზე მოთხოვნა მზარდია. სტუმრების დიდ ნაწილს ადგილობრივების პარარელურად, უკრაინელები და რუსები წარმოადგენენ.
ცნობისთვის, მარანი საოჯახო ბიზნესია, რომელიც სულ მიმდინარე წელს გაიხსნა და სტუმრებს ავთენტურ, ტრადიციული ტექნოლოგიით დაყენებულ ქვევრის ღვინოს სთავაზობს.
