"მაგთი" და "სილქნეტი" რეიტინგულ ტელეკომპანიებს უჩივიან
კომუნიკაციების კომისია მაუწყებლობის სერვისის გამავრცელებელი კომპანიების საჩივარს განიხილავს.
როგორც კომუნიკაციების კომისიის წევრი ვახტანგ აბაშიძე აცხადებს, საჩივარი ყველაზე რეიტინგული მაუწყებლების წინააღმდეგაა მიმართული, რადგან მათ საკუთარი კონტენტის გავრცელებისთვის გარკვეული თანხა მოითხოვეს. ტრანზიტორმა კოპანიებმა კი მიიჩნიეს, რომ საქმე ეხება კონკურენციის კანონის დარღვევას და შეთანხმებულ ქმედებას და სწორედ ამ მიმართულებით გაასაჩივრეს საკითხი კომუნიკაციების კომისიაში.
„საქმე ეხება ისეთ მაუწყებლებს, როგორებიც არიან „იმედი“, „მთავარი არხი“, „ტვ პირველი“ და კიდევ ორი-სამი კომპანია. მათ „სილქნეტს“, „მაგთის“ და სხვა საკაბელო კომპანიებს მოთხოვეს თანხის გადახდა მათი კონტენტის გავრცელებაში. გამავრცელებლებმა ეს მიიჩნიეს კონკურენციის კანონის პრინციპების დარღვევად კომისიაში და ეს საკითხი იხილება სწორედ მოქმედი კანონმდებლობით - გვაქვს თუ არა რაიმე დარღვევა. ამჟამად კონკურენციის საააგენტოსთან ერთად ვსწავლობთ საკითხს კონკურენციის ახალი კანონის გათვალისწინებით. მიმდინარეობს საერთაშორისო გამოცდილების შესწავლა და გაზიარება, ასევე ტარდება კვლევა და შედეგი უნდა დადგეს რამდენიმე თვეში“ - აცხადებს ვახტანგ აბაშიძე.
