"ლიმომ" 2-დან 12 წლამდე ბავშვებისთვის ფეხსაცმლის ხაზი შექმნა

საბავშვო ტანსაცმლის მწარმოებელმა ბრენდმა - „ლიმო“ ფეხსაცმლის წარმოება დაიწყო.

როგორც „ბიზნესპარტნიორთან“ კომპანიის დამფუძნებელი ნინო გიორგაძე აცხადებს, ახალი პროექტი კომპანია Saldemode-თან თანამშრომლობით განხორციელდა.

„ჩვენ და Saldemode-მა გავაკეთეთ ერთობლივი ხაზი და შევქმენით საბავშვო ფეხსაცმელი 2024 წლის ზამთრის კოლექციისთვის, რომელიც Saldemode-ის საწარმოში იკერება. პროდუქცია მზადდება ნატურალური ტყავითა და მასალებით. არის აბსოლუტურად თანამედროვე და ექსკლუზიური დიზაინის. შექმნილია, ისევე როგორც ჩვენი სამოსი, 2-დან 12 წლამდე ასაკის ბავშვებისთვის“, - განმარტა ნინო გიორგაძემ.

მისივე ინფორმაციით, „ლიმოს“ ახალი, საბავშვო ფეხსაცმელი იტალიაში გამართულ საერთაშორისო გამოფენაზეც წარადგინეს. რაც შეეხება რეალიზაციას, მისი გაყიდვა მიმდინარე წლის შემოდგომიდან დაიწყება.

ცნობისთვის, „ლიმო“ ბაზარზე 2020 წლიდან საქმიანობს, ის საწარმოს გორში ფლობს და 30-ამდე ადამიანს ასაქმებს.