ლაშა ხუციშვილი: ქონების გადასახადისგან გათავისუფლებით ტურიზმის სექტორი ₾40 მლნ-ს დაზოგავს
პარლამენტის მიერ მიღებული კანონი ძალაში შევიდა და ტურიზმის სექტორი 2021 წლის ქონების გადასახადისაგან (რომლის დეკლარირებაც 2022 წელს არის გათვალისწინებული) გათავისუფლდა.
ფინანსთა მინისტრის ლაშა ხუციშვილის განცხადებით, ქონების გადასახადისგან გათავისუფლდა 1 200-ზე მეტი მეწარმე, ჯამში ისინი 40 მლნ ლარს დაზოგავენ.
"ამ სექტორისთვის მნიშვნელოვანი ინიციატივაა. ტურიზმის სექტორში აღდგენის ის ტემპი, რომელიც გვაქვს ბოლო თვეების განმავლობაში, ნამდვილად დამაიმედებელია", - აღნიშნა ლაშა ხუციშვილმა.
ფინანსთა სამინისტროს ინფორმაციით, შეღავათით სარგებლობის საქმიანობებს განეკუთვნება: სასტუმროები და განთავსების მსგავსი საშუალებები, დასასვენებელი და სხვა მოკლევადიანი განთავსების საშუალებები, რესტორნები და საკვებით მობილური მომსახურების საქმიანობები, სასმელებით მომსახურების საქმიანობები, ტურისტული სააგენტოები, ტურ-ოპერატორები და სხვა დაჯავშნის მომსახურება და მათთან დაკავშირებული საქმიანობები.
უწყების ინფორმაციით, საგადასახადო შეღავათი ვრცელდება იჯარით, ლიზინგით ან სხვა ამგვარი ფორმით გადაცემულ ქონებაზეც, თუ ეს ქონება ასევე გამოიყენება რომელიმე ზემოაღნიშნულ საქმიანობაში.
