ქვეყანაში ხის კოტეჯები გაძვირდა - კვ.მეტრის ფასი $350-დან იწყება

ქვეყანაში ხის კოტეჯები გაძვირდა. რეგიონში მიმდინარე გეოპოლიტიკური მოვლენებიდან გამომდინარე, მშენებლობისთვის საჭირო ნედლეულზე ფასებმა მკვეთრად მოიმატა, გაძვირდა მათი ტრანსპორტირებაც, რაც საბოლოო ჯამში, საქართველოში წარმოებული პროდუქტის ფასზე აისახა.

როგორც „ბიზნესპარტნიორს“ კომპანია kotejebi.ge-ის მთავარმა არქიტექტორმა გიორგი მგელაძემ განუცხადა, თუ აქამდე1 კვადრატული მეტრის ღირებულება 250-300 დოლარიდან იწყებოდა, ახლა ფასები 350 დოლარიდან იწყება.

„მიუხედავად გაზრდილი ფასებისა, ქვეყანაში ხის კოტეჯებზე მოთხოვნა ძალიან დიდია. ძირითადი მოთხოვნა მთიანი რეგიონებიდანაა. დამკვეთები კოტეჯებს უმეტესად ბიზნესისთვის აშენებენ. გვყავს როგორც ადგილობრივი, ისე უცხოელი კლიენტები, რომლებიც ინვესტიციას დებენ ხის კოტეჯებში და აქ სასტუმროების ბიზნესს იწყებენ“, - ამბობს გიორგი მგელაძე.

მისივე თქმით, 2022 წელი kotejebi.ge-ისთვის წარმატებული აღმოჩნდა და გასულ წელთან შედარებით, მეტი კოტეჯი გაიყიდა.

„აქამდე თვეში 3-4 პროექტის შეკვეთა გვქონდა, ახლა ეს რიცხვი თვეში 6 პროექტამდეა გაზრდილი. იზრდება იმ კომპანიების რიცხვიც, რომლებიც ჩვენს ქვეყანაში ხის კოტეჯებს აწარმოებენ“, - აღნიშნავს გიორგი მგელაძე.

ცნობისთვის, kotejebi.ge ბაზარზე 2 წლის წინ გამოჩნდა და უკვე 10-ამდე დასრულებული პროექტის ავტორია.