კურიერების აქციის ორგანიზატორი: "ჩვენ შესვენება გვაქვს, სხვა ქვეყნების აქციებს სიმბოლურად გამოვეხმაურეთ"
სააკაძის მოედნის მიმდებარედ კურიერების მცირე ჯგუფი იყო შეკრებილი. უცნობია, რა მოთხოვნები აქვთ კურიერებს, ამიტომ, ჩვენ ინფორმაცია საპროტესტო აქციების ორგანიზატორთან და კურიერების ლიდერთან, სანდრო ლომინაშვილთან (არჩიბალდ მეკეში) გადავამოწმეთ.
„ევროპის რვა ქალაქში მიმდინარეობს ვოლტის კურიერების აქცია ჩვენ პარალელურად. ახლა მეორე ტალღა მიმდინარეობს ევროპაში და ამ ერთი აქციით გამოვეხმაურეთ, სოლიდარულები ვართ ერთმანეთის მიმართ. ახლა იქ ინტენსიურ ფაზაში არიან და ჩვენ შესვენება გვაქვს. სხვა ქვეყნების აქციებს სიმბოლურად გამოვეხმაურეთ,“ - განმარტავს არჩიბალდ მეკეში.
აღსანიშნავია, რომ უცხოურ მედიაში, ამ დროისთვის, ევროპის სხვადასხვა ქალაქში კურიერების მიმდინარე აქციასთან დაკავშირებით ინფორმაცია არ გავრცელებულა.
ინფორმაცია გადავამოწმეთ პროტესტის ერთ-ერთ ორგანიზატორ კურიერთანაც. გიორგი მამალაშვილი ამბობს, რომ კურიერებმა ჯერ არ იციან, რა ფორმით განაგრძობენ პროტესტის გამოხატვას.
„საპროტესტო აქცია არა, ჩვენი პატარა შეკრებაა. ევროპის შვიდი ქვეყანაა გაფიცული, ზოგადად აპროტესტებენ ჩეხეთი, საბერძნეთი, დანია, ფინეთი, ხორვატია, გერმანია და სერბეთი და ვუერთდებით სოლიდარობის კუთხით. საპროტესტო აქცია არ არის, უბრალოდ შევიკრიბეთ, შევხვდით 28 ქვეყნის არასამთავრობო ორგანიზაციას და შემდეგ ნაბიჯებზე ვლაპარაკობთ, რა იქნება. სამომავლოდ, რა ფორმით გადაწყდება პროტესტი, ზუსტად არ ვიცით ჯერ,“ - ამბობს გიორგი მამალაშვილი.
გაურკვეველია, რომელ აქციას გამოუცხადეს სოლიდარობა თბილისში შეკრებილმა მცირე ჯგუფმა, რომლთაც არც საკუთარი მოთხოვნა არ გაუჟღერებიათ.
