კონსტანცა-ფოთს შორის საბორნე მიმოსვლა მაისიდან დაიწყება - პროექტს Pontos Maritime-ი განახორციელებს
კონსტანცასა და ფოთს შორის საბორნე მიმოსვლა მომავალი წლის მაისიდან იგეგმება.
კონსტაცაში საჭირო ინფრასტრუქტურის - ნავმისადგომის, ტერმინალისა და მულტიმოდალური სერვისისთვის ჩიხის მოწყობა უკვე დაწყებულია. პროექტს Pontos Maritime-ი ახორციელებს.
როგორც "ბიზნესპარტნიორს" კომპანიის დამფუძნებელმა და დირექტორმა პაატა დაიაურმა მარშრუტი გადამზიდავებს, იმპორტიორებსა და ექსპორტიორებს საშუალებას მისცემს გაანახევრონ ევროკავშირისა და ბალკანეთის ქვეყნებთან ტვირთის მიმოსვლისთვის არსებული დრო, მაგალითისთვის ცენტრალურ ევროპაში ტვირთის გადატანა 6-7 დღეში იქნება შესაძლებელი.
ინფრასტრუქტურის მოწყობის სამუშაოებს კომპანია DP World-ი ახორციელებს, ნოემბრიდან კი Pontos Maritime-ის და DP World-ის, ასევე რუმინეთისა და საქართველოს საბაჟო სამსახურების მონაწილეობით შეიქმნება სამუშო ჯგუფი ტვირთის მიმოსვლისთვის საჭირო დოკუმენტაციის ელექტრონული მიმოცვლის მიზნით, რაც მნიშვნელოვნად გაამარტივებს და დააჩქარებს გადამზიდავების მიერ ევროკავშირისა და საქართველოს საზღვრის კვეთას და ბიუროკრატიას.
კომპანიაში ამბობენ, რომ ბოლო სამი წლის მანძილზე მნიშვნელოვანი სამუშაო იქნა გაწეული ერთი მხრივ ინფრასტრუქტურის მომზადების, ასევე ბიუროკრატიული ბარიერების გამარტივების მხრივ.
კომპანიაში ევროკავშირის მიერ გაცხადებულ "საფლაგმანო ინიციატივაზეც" აცხადებენ, რაც დამატებით კაპიტალის მოზიდვის საშუალებას იძლევა შავ ზღვაზე უფრო ინტენსიური სატრანსპორტო მიმოსვლის განსავითარებლად.
