კონკურენციის ეროვნულმა სააგენტომ "რეტკოს" საჩივარი დაუშვებლად ცნო

საკითხი ეხებოდა - სს „საქართველოს რკინიგზის“ მიერ „კონკურენციის შესახებ“ საქართველოს კანონის მე-10 მუხლის, ხოლო შპს „ქსელმშენის“, შპს „ჯორჯიან ინჟინერინგ კომპანისა“ და შპს „ხადას“ მიერ კანონის მე-7 მუხლის სავარაუდო დარღვევის ფაქტს (შეთანხმებული ქმედება). კერძოდ, მომჩივანი სადავოდ ხდიდა სს „საქართველოს რკინიგზის“, მიერ გამოცხადებულ ტენდერებში მიწოდების 30 დღიანი ვადის დაწესებას და მიიჩნევდა, რომ ამით შეიზღუდა კონკურენცია.

 

კონკურენციის სააგენტოს ინფორმაციით, საჩივრის დასაშვებობის შემოწმების ეტაპზე, სააგენტომ შეისწავლა მითითებული სადავო ტენდერები, ჩატარებული ბაზრის კვლევები და მიღებული ინფორმაცია/მტკიცებულებები.

 

"ანალიზის შედეგად დადგინდა, რომ შემსყიდველმა ორგანიზაციამ ბაზრის კვლევა განახორციელა ორჯერ, რომლის ფარგლებშიც სადავო სატენდერო პირობას აკმაყოფილებდა სულ მცირე 6 ეკონომიკური აგენტი. შესაბამისად, ვერ დადგინდა ის კონკრეტული სუბიექტი, რომელსაც დაუწესდა შეღავათი ან შეექმნა დომინანტური მდგომარეობა ადმინისტრაციული ორგანოს მიერ. საქმეში ასევე არ არსებობდა სარწმუნო მტკიცებულებები, რომელიც წარმოშობდა გონივრულ ეჭვს ხსენებულ 3 ეკონომიკურ აგენტს შორის კონკურენციის შემზღუდველი შეთანხმების არსებობის შესახებ,"-აღნიშნულია სააგენტოს მიერ გავრცელებულ განცხადებაში.