კომპანია "ოჯახური" საექსპორტო ბაზრების გაფართოებას გეგმავს

სუნელების მწარმოებელი კომპანია „ოჯახური“ საექსპორტო ბაზრების გაფართოებაზე მუშაობს. 

როგორც კომპანიის საზოგადოებასთან ურთიერთობის მენეჯერი  სალომე ნეფარიძე "ბიზნესპარტნიორთან" აცხადებს, „ოჯახური“ ამ ეტაპზე მოლაპარაკებას სომხეთთან აწარმოებს, სადაც სულ ცოტა ხნის წინ ქართული ქსელური მარკეტი გაიხსნა. სწორედ ამ მარკეტში  განიხილება საქართველოში წარმოებული სუნელების შეტანა. 

„წლიდან წლამდე იზრდება ქართულ სუნელებზე მოთხოვნა, როგორც ადგილობრივ, ასევე საერთაშორისო ბაზრებზე. ჩვენი სანელებლები და სხვა ნაწარმი 10-მდე ქვეყანაში გადის, მათ შორის არის გერმანია, პოლონეთი და ჩეხეთი.

ჩვენთვის ერთ-ერთი დიდი გამოწვევა როგორც ადგილობრივ, ასევე საერთაშორისო ბაზრებზე  ჯანსაღი და ნატურალური ნედლეულის მოპოვებაა," -აღნიშნავს ნეფარიძე.

კომპანია ნედლეულის ნაწილს ადგილობრივად იძენს, ნაწილი კი იმპორტით შემოაქვს. 

ქსელურ მარკეტებში „ოჯახურის“ სუნელ-სანელებლების ფასი 3-დან 5 ლარამდე მერყეობს. ფასის შენარჩუნება კი კომპანიამ საწარმოში არსებული ნედლეულის მარაგების ხარჯზე შეძლო. 

როგორც „ოჯახურის“ საზოგადოებასთან ურთიერთობის მენეჯერი აცხადებს, პროდუქცია ლაბორატორიულად ყველა მაჩვენებელზე მუდმივად მოწმდება, რასაც სურსათის ეროვნული სააგენტო ყოველწლიურად ამოწმებს და  რისი მოთხოვნაც საექსპორტო ქვეყნებს აქვთ.

ცნობისთვის, კომპანია „ოჯახურის“ სუნელ-სანელებლების საწარმო 13 წელია ბაზარზეა და ამჟამად 90-მდე დასახელების სუნელს აწარმოებს. გარდა ამისა, კომპანია  აქტიურად აწარმოებს  მარინადებს, სოუსებსა და ჯემებს, რომლის რეალიზაციასაც ახდენს როგორც ადგილობრივ, ისე საერთაშორისო ბაზრებზე.