კომპანია "ლეველი" საწარმოს აფართოებს

ვერცხლის სამკაულებისა და აქსესუარების მწარმოებელი კომპანია „ლეველი“ საწარმოს აფართოებს. ამის შესახებ „ბიზნესპარტნიორს" კომპანიის მარკეტინგის ხელმძღვანელმა ნინი ჭელიძემ განუცხადა.

მისი ინფორმაციით, ბოლო პერიოდში მოთხოვნა საგრძნობლადაა გაზრდილი, აქედან გამომდინარე, ზაფხულში იგეგმება ახალი საწარმოს გახსნა.

„ამ ეტაპისთვის ექსპორტზე  ამერიკასა და გერმანიაში გავდივართ და სხვა ქვეყნებიდანაც არის დაინტერესება,"-აცხადებს ჭელიძე.

კომპანია პროდუქციის რეალიზაციას ახდენს როგორც  ონლაინ გაყიდვების საშუალებით, ასევე მომხმარებელს   ადგილზე, მაღაზიაში ყიდვის შესაძლებლობაც აქვს, რომელიც საბურთალოს ტერიტორიაზე მდებარეობს.

ვერცხლის სამკაულებისა და აქსესუარების საწყისი ფასი 25 ლარიდან იწყება და 150 ლარამდე მერყეობს.

როგორც „ლეველი“-ს მარკეტინგის ხელმძღვანელი აღნიშნავს, ქვეყანაში  არსებული მძიმე ეკონომიკური მდგომარეობიდან გამომდინარე, ასევე ნედლეულზე ფასის მატების გამო, ბრენდს მცირედით ფასების მცირედით მომატება მოუწია, თუმცა ვინაიდან ბრედის მიზანია ყველასათვის ხელმისაწვდომი იყოს, მაქსიმალურად ეცადნენ ფასებს შორის სხვაობა არ ყოფილიყო ძალიან დიდი

აღსანიშნავია, რომ კომპანია გეგმავს პროდუქციაში ტანსაცმლის ხაზის დამატებას, რომელიც გაყიდვაში უახლოეს მომავალში ჩაეშვება.

შეგახსენებთ, კომპანია „ლეველი“ ბაზარზე  2020 წლიდან ოპერირებს და მომხმარებელს  უმაღლესი სინჯის ვერცხლისაგან დამზადებულ სამკაულებსა და აქსესუარებს სთავაზობს.