კომფორტ-ტაქსი: ტაქსების "ბასლაინებში" დაშვება გზის დანარჩენ ზოლებში მოძრაობას განტვირთავს

ტაქსებისთვის ავტობუსების ზოლში მოძრაობის დაშვება დადებითი გადაწყვეტილებაა და ეს ცვლილება მგზავრისთვის კომფორტის შექმნასთან ერთად მოძრაობის განტვირთვასაცნ შეუწყობს ხელს. ამის შესახებ „ბიზნესპარტნიორს“ ტაქსის კომპანია „კომფორტ-ტაქსის“  დამფუძნებელმა ლევან თავართქილაძემ განუცხადა.

„ევროპაშიც და ამერიკაშიც ტაქსებს აქვთ უფლება, იმოძრაონ საზოგადოებრივი ტრანსპორტისთვის განკუთვნილ ზოლში, რათა მათ მგზავრები შეფერხების გარეშე აიყვანონ და უფრო თავისუფლად იმოძრაონ. რაც შეეხება იმას, ხომ არ გადატვირთავს ეს ცვლილება „ბასლაინებს,“ ცხადია, ასე არ მოხდება, რადგან ეს ზოლი საკმაოდ თავისუფალია და საცობები მათ გვერდითა ზოლებშია, რადგან გზის დანარჩენი ნაწილები უფრო გადატვირთულია,“ - განაცხადა თავართქილაძემ.

შეგახსენებთ, თბილისის მერმა დღეს განაცხადა, რომ A კატეგორიის იმ ტაქსებს, რომელთა ასაკი არ აღემატება 10 წელს, პირველი ივნისიდან ავტობუსის ზოლში მოძრაობა შეეძლებათ.

კახა კალაძის თქმით, მიმდინარე წლის მაისიდან მუნიციპალურ სერვისცენტრებში ე.წ. სტიკერების დარიგება დაიწყება A კატეგორიის იმ ტაქსებისთვის, რომელთაც ავტობუსის ზოლში მოძრაობის უფლება აქვთ.

დედაქალაქის მერის თქმით, ტაქსი დაიშვება ავტობუსის ზოლში მხოლოდ იქ, სადაც საზოგადოებრივი ტრანსპორტი გადაადგილდება სხვა ავტოსატრანსპორტო საშუალებების მოძრაობის მიმართულებით.