"კაზმე“ 2024 წელს ბრენდული მაღაზიის გახსნას გეგმავს

მომავალი წლის გაზაფხულზე ბავშვის ტანსაცმლის მწარმოებელი კომპანია „კაზმე“ მაღაზიის გახსნას გეგმავს. ამის შესახებ „ბიზნესპარტნიორს“ კომპანიის თანადამფუძნებელმა, ლიგური  ბეროშვილმა განუცხადა.

მისი ინფორმაციით, ამ ეტაპზე მაღაზიის გახსნა მხოლოდ იდეაა და მისი აღსრულების საკითხი მოთხოვნასა და გარემო პირობებზეა დამოკიდებული.

რაც შეეხება წარმოებას, კომპანია ამ ეტაპზე ბავშვის ტანსაცმლის ხაზს აწარმოებს, რომელიც ნაციონალური სამოსის ელემენტებითაა შეკერილი.

ნედლეულის უმეტესი ნაწილი შედარებით დაბალი ფასის გამო, „კაზმეს“ ჩინეთიდან და თურქეთიდან შემოაქვს, თუმცა, გარკვეულ დეტალებს საქართველოშიც ყიდულობს. 

„ჯერჯერობით მხოლოდ ბავშვის ხაზი გვაქვს წარმოდგენილი, თუმცა შეკვეთით დიდ სამოსსაც ვამზადებთ. სამომავლოდ კი, მოთხოვნიდან გამომდინარე გვინდა ეს ხაზიც ავამოქმედოთ. 

ძირითადად, ჩვენ რასაც ვკერავთ, მისი 40-50% საექსპორტოდ იგზავნება, უმეტესწილად ამერიკაში. „ -აცხადებს ბეროშვილი.

აღსანიშნავია, რომ „კაზმე“ ტანსაცმელს თბილისში, საკუთარ საწარმოში (ქეთევან წამებულის N92) კერავს და მომხმარებელს მოდელების დათვალიერება ადგილზევე შეუძლია. თუმცა, როგორც მაღაზიის თანადამფუძნებელი განმარტავს, ძირითადად პროდუქციის რეალიზაცია ონლაინ ხდება.

ამ ეტაპზე კომპანიაში 5 ადამიანია დასაქმებული და გაფართოების შემთხვევაში, კადრების დამატება იგეგმება.

ცნობისთვის, ბავშვის ტანსაცმლის მწარმოებელი კომპანია „კაზმე“ საქართველოს ბაზარზე 3 თვეა ოპერირებს.