კავკასიის ავტოიმპორტი: უკრაინაში ავტომობილებზე ხელოვნური მოთხოვნა გაჩნდა, განვაახლეთ გაყიდვები

უკრაინაში გაყიდვები განვაახლეთ, ცხადია, ეს არ არის ის ციფრები, რაც ომამდე იყო, თუმცა აღნიშნული ფაქტი ოპტიმისტურ მოლოდინებს აჩენს. ვფიქრობთ, რომ მომავალში, უახლოეს 1-2 წელიწადში,გაყიდვების ძველ მაჩვენებლებს დავუბრუნდებით, - ამის შესახებ „ბიზნესპარტნიორს“ კომპანია „კავკასიის ავტოიმპორტის” გაყიდვების დირექტორმა ალექსანდრე ვეკუამ განუცხადა.

მისი თქმით, კომპანიას, ამჟამად, უკრაინაში 8 ფილიალის ნაცვლად 3 ფილიალი აქვს.  რაც შეეხება გაყიდვებს, რუსეთ-უკრაინის ომამდელ პერიოდთან შედარებით ფიქსირდება 60%-იანი ვარდნა.

ვეკუას ინფორმაციით, მიუხედავად ამისა,  უკრაინულ ბაზარზე  გაჩნდა ხელოვნური მოთხოვნა, რაც საომარმა ვითარებამ განაპირობა.

"შიდა ბაზარზე დეფიციტია, ამიტომ მისი შევსება ძირითადად, ამერიკიდან გვიწევს. უკრაინელები ჩვენგან, უმეტესად, ბიუჯეტურ 15 ათას დოლარამდე ღირებულების, 10 წლამდე ავტომობილებს ყიდულობენ“, - განმარტავს ალექსანდრე ვეკუა.

„კავკასიის ავტოიმპორტის” გაყიდვების დირექტორმა სხვა საექსპორტო ბაზრებზეც ისაუბრა და აღნიშნა, რომ საქართველოდან ავტომობილების ექსპორტი და რეექსპორტი შუა აზიის ქვეყნებში გააქტიურებულია.

„3-4 წლის წინ შუა აზიის ბაზრებზე, მაგალითად - ყაზახეთში თუ არ ხდებოდა ავტომობილების ექსპორტი, დღეს უკვე ამ ბაზრებმა წინა ფლანგზე გადმოიწია. ამჟამად, საქართველოდან ავტომობილების საექსპორტო ბაზრების სიაში, პირველ-მეორე ადგილს იყოფენ ყაზახეთი და ყირგიზეთი. შემდეგ მოდის სომხეთი და აზერბაიჯანი. შუა აზია, როგორც მომხმარებელი დაუბრუნდა საქართველოს და დღეს, ჩვენი ქვეყნიდან ამ მიმართულებით ათასობით ავტომობილის ექსპორტი ხდება“, - განუცხადა „ბიზნესპარტნიორს“ „კავკასიის ავტოიმპორტის” გაყიდვების დირექტორმა.

მისივე ინფორმაციით, შუა აზიის ბაზრებზე, უფრო ხშირად, 5 წლამდე, 15-დან 25 დოლარამდე ღირებულების ავტომობილები გადის ექსპორტზე.