"ქართულმა ხიზილალამ" წარმადობა 15-20%-ით გაზარდა და ახალი პროდუქტები გამოუშვა

თევზისა და თევზის პროდუქტების მწარმოებელმა კომპანიამ, სახელწოდებით „ქართული ხიზილალა“ წარმადობა 15-20%-ით გაზარდა. როგორც „ბიზნესპარტნიორს“ კომპანიის ხელმძღვანელმა ალექსანდრე დადიანიძემ განუცხადა, „ქართულმა ხიზილალამ“ ასორტიმენტი გააფართოვა და ცივი და ცხელი შებოლვის პროდუქციის წარმოება დაიწყო.

„ეს გულისხმობს სხვადასხვა სახეობის თევზის როგორც  ცივ, ისე ცხლად შებოლვის პროცესს. ახალი პროდუქტები რეალიზაციაში უკვე ჩავუშვით და ჯერჯერობით, ადგილობრივად, ჩვენივე მეურნეობაში არსებულ საფირმო მაღაზიაში იყიდება“, - განმარტა ალექსანდრე დადიანიძემ.

მისივე თქმით, ახალ პროდუქციაზე მოთხოვნა მაღალი არ არის, რაც ზაფხულის სეზონს უკავშირდება.

„ზაფხული ამ პროდუქციის რეალიზაციისთვის იდეალური დრო ნამდვილად არ არის, ამიტომ გაყიდვების ზრდას შემოდგომიდან ველოდებით. გარდა ამისა, კიდევ ვამატებთ ზღვის პროდუქტებს. ესპანეთიდან ჩამოგვაქვს ექსკლუზიურად, დაახლოებით, 8 სახეობის ზღვის პროდუქცია“, - აღნიშნა „ქართული ხიზილალას“ ხელმძღვანელმა.

მისივე თქმით, ეს პროდუქტები იქნება: კრევეტები, კალმარები, არგენტინული ლანგუსტები და სხვა. ისინი რეალიზაციაში, დაახლოებით, 1 თვეში ჩაეშვება.

ცნობისთვის, კომპანია „ქართული ხიზილალა“ ბაზარზე 2003 წელს გამოჩნდა. მის საკუთრებაშია გორის რაიონის სოფელ კარალეთში მდებარე რამდენიმე თევზსაშენი, საფირმო მაღაზია და რესტორანი „თევზის სახლი“. ამ ეტაპზე, კომპანია წელიწადში 150  ტონაზე მეტ სხვადასხვა სახეობის თევზს აწარმოებს.