ქართული წარმოების ფერადი გორგოლაჭები მეზობელ ქვეყნებში გაიყიდება
ქართული, ფერადი გორგოლაჭები მეზობელ ქვეყნებში გაიყიდება. საექსპორტო გეგმებზე „ბიზნესპარტნიორთან“ ამიერკავკასიაში, გორგოლაჭების მწარმოებელი ერთადერთი საწარმოს - „მისკუზის“ თანამდამფუძნებელმა მარიამ ქემოკლიძემ ისაუბრა.
„მოგეხსენებათ,თავდაპირველად, საქართველოში წარმოებული ეკომეგობრული, ფერადი გორგოლაჭებით აშშ-ში დაინტერესდნენ. თუმცა, ტრანსპორტირების მაღალი ხარჯებიდან გამომდინარე, გადავწყვიტეთ, ამ ეტაპზე ამერიკაში ექსპორტისგან თავი შევიკავოთ და საწყის ეტაპზე, მეზობელ ქვეყნებში გავიდეთ.
როგორც იცით, მსოფლიო ბაზარზე გორგოლაჭებზე იმდენად დიდი მოთხოვნაა, რომ საქართველოდან ამ პროდუქტის იმპორტით უკვე რამდენიმე ქვეყანა დაინტერესდა. საექსპორტო გეგმების განსახორციელებლად, უკვე გავზარდეთ წარმოება და სულ ცოტა ხნის წინ, ახალ საწარმოში გადავედით. შესაბამისად, უახლოეს პერიოდში, ქართული წარმოების ფერად გორგოლაჭებს მეზობელ ქვეყნებშიც გავყიდით“, - აღნიშნა მარიამ ქემოკლიძემ.
მისივე განმარტებით, „მისკუზის“ პროდუქციას ადგილობრივ ბაზარზე ანალოგი არ აქვს, შესაბამისად, ინტერესი და გაყიდვების მაჩვენებელი მაღალია საქართველოშიც.
ცნობისთვის, საქართველოში ეკომეგობრული, ფერადი გორგოლაჭების წარმოება იმპორტირებული ნედლეულით, 2022 წელს დაიწყო. ამ ეტაპზე, თვეში 100-მდე გორგოლაჭი იწარმოება.
„მისკუზის“ დამფუძნებლები ამბობენ, რომ ამით ადგილობრივ ბაზარზე არსებულ მოთხოვნას სრულად აკმაყოფილებენ და იმპორტირებულ პროდუქციასაც კონკურენციას უწევენ.
