"ქართული ხიზილალა" საფირმო მაღაზიას თბილისშიც გახსნის
"ქართული ხიზილალა" საფირმო მაღაზიას თბილისშიც გახსნის. როგორც „ბიზნესპარტნიორს“ თევზისა და თევზის პროდუქტების მწარმოებელი კომპანია „ქართული ხიზილალას“ ხელმძღვანელმა ალექსანდრე დადიანიძემ განუცხადა, ამ კუთხით სამუშოები უკვე დაწყებულია.
„როგორც იცით, ამჟამად, ერთ სარეალიზაციო წერტილს ვფლობთ, ისიც ჩვენივე მეურნეობაში, გორის რაიონში. გვინდა, რომ 2023 წლის ბოლომდე თბილისშიც გავხსნათ საფირმო მაღაზია. ამჟამად, მიმდინარეობს ადგილის შერჩევის პროცესი“, - აღნიშნა „ქართული ხიზილალას“ ხელმძღვანელმა.
ალექსანდრე დადიანიძეს განმარტებით, „ქართული ხიზილალას“ პროდუქციის ძირითადი მომხმარებლები სწორედ დედაქალაქის მაცხოვრებლები და ტურისტები არიან.
„ტურისტების ნაკადი წლიდან წლამდე მზარდია. ისინი ჩვენს მეურნეობას ეცნობიან, ათვალიერებენ, შემდეგ „ქართული ხიზილალას“ პროდუქციას ადგილზე აგემოვნებენ და ყიდულობენ. სხვათაშორის, მაღალი ინტერესია ტაილანდელი, ტაივანელი და ზოგადად, აზიიდან ჩამოსული ტურისტების მხრიდან“, - განუცხადა „ბიზნესპარტნიორს“ დადიანიძემ.
ცნობისთვის, კომპანია „ქართული ხიზილალა“ ბაზარზე 2003 წელს გამოჩნდა. მის საკუთრებაშია გორის რაიონის სოფელ კარალეთში მდებარე რამდენიმე თევზსაშენი, საფირმო მაღაზია და რესტორანი „თევზის სახლი“. ამ ეტაპზე, კომპანია წელიწადში 150 ტონაზე მეტ სხვადასხვა სახეობის თევზს აწარმოებს.
