ქართული ჩაის კომპანია "ოკრიბა" მწვანე ჩაის წარმოებას გეგმავს
ქართული ჩაის კომპანია „ოკრიბა“ ბიუჯეტური ხაზის გაფართოებას გეგმავს. ამის შესახებ გადაცემა „ბიზნეს პოსტს“ კომპანიის მენეჯერმა, მინდია ძნელაძემ განუცხადა.
მისი ინფორმაციით, კომპანია ამ დრომდე 6 სახის პრემიუმ ხარისხის ჩაის აწარმოებდა, თუმცა ბაზრის კვლევიდან გამომდინარე, ბოლო ორი თვეა ახალი ბრენდი „ბუეთის“ ქვეშ ბიუჯეტური ხაზის, კლასიკური შავი ჩაის წარმოება დაიწყო.
თუმცა, იქიდან გამომდინარე, რომ მოთხოვნა მზარდია, უახლოეს მომავალში კომპანია მწვანე ჩაის დამატებასაც გეგმავს.
"ჩვენს პრემიუმ და ბიუჯეტურ ხაზს საკმაოდ კარგი გამოხმაურება ჰქონდა როგორც მომხმარებლის, ასევე HoReCa სექტორის მხრიდან," -აცხადებს ძნელაძე.
მისივე განმარტებით, მიზანი ადგილობრივი ბაზარის ათვისება და რეგიონებში გაძლიერებაა, რის შემდეგაც აქტიურად მოხდება სხავადასხვა ქვეყნებში ექსპორტის განხორციელება. მათ შორის იქნება - გერმანია, გაერთიანებული ემირატები, კატარი, ამერიკასა და დასავლეთ ევროპის ბაზრები.
კომპანიამ FDA სერტიფიკატი მიიღო, რომელიც ამერიკაში ექსპორტის განხორციელებაში ხელს შეუწყობს.
ამას გარდა, ჩაის მწარმოებელი კომპანია „ოკრიბა“ ბიო მიმართულებითაც აქტიურად მუშაობს. როგორც ძნელაძე აღნიშნავს, მათ მიერ წარმოებული პრემიუმ ხაზის ჩაი ბიოდეგრადირებად პაკეტებშია მოთავსებული, ხოლო ჩაი ხელითაა დაკრეფილი, ყველანაირი მინარევის გარეშე.
ცნობისთვის, ჩაის მწარმოებელი კომპანია ,,ოკრიბას’’ ჩაის პლანტაციები იმერეთში, ტყიბულის მუნიციპალიტეტის მთიან ზონაშია გაშენებული.
აღსანიშნავია, რომ კომპანია ჩაის კრეფისა და დამუშავების, როგორც ტრადიციულ, ასევე თანამედროვე ტექნოლოგიებს იყენებს.
